Bella a tretus, ma finas sperdissiada, sa Torres de Tatari bincit “feti” po 3-2, cun sa Recanatese, una partida chi podiat serrai a innantis meda cun trancuillidadi de prus chi iat airi gioagua cun prus crobba in is orus de sa porta nemiga. Torrat a cumentzai, duncas, su caminu in su stadiu “Vanni Sanna” de is sassaresus de s’allenadori Greco chi de averas funt sa sola scuadra chi podint arriolai cussus de su Cesena, chi, a dogna manera, at bintu in domu sua cun s’atra scuadra sarda de sa Serie C, s’Olbia. Po sa torres ant fatu gol Dametto, Mastinu e Idda.
Ma non feti custus atrus tres puntus po sa scuadra de Tatari. Difatis sa Torres est sa sola scuadra chi at giai fatu meglius de ocannu passau: corantaseti puntus ocannu, contras de is corantunu in totu de su campionau 2022-23. E ddu at fatu, spantosamenti, a innantis chi essit acabbada sa parti de unu de su 2023-2024.
Su caminu de su Cesena e de sa Torres est po immoi de record. Chi is duas scuadras meris de su gironi B ant a sighiri comenti funt fendu ant acabbai su campionau unua a norantatres puntus e s’atra a otantanoi. Una cosa de macus. Bastat a pensa ca in is urtimus campionaus, sempiri a binti scuadras, su record si ddu poderat su Modena (in su campionau de su 2021-22) cun otantotu puntus in su mentris chi sa Reggiana ocannu passau nd’at fatu otantunu. In su 2020-21 su Perugia e su Padova, paris, iant acabau su campionau cun setantanoi puntus peruna e s’annu a innantis su Pordenone iat bintu su campionau cun feti setantatres puntus.
At essi dificili meda chi su Cesena cun sa Torres ant a sighiri a curriri aici meda, ma po s’ora ant ammanniau sa distantzia cun is atras scuadras chi funt sighendu: sa Carrarese difatis, sa de tres, est a sa stesiada de doxi puntus e su Perugia, sa de cuatru, est a catodixi puntus agoa.
Màuru Mura
Dominigu, su seti de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sassarioggi.it/sport/torres-ufficialmente-serie-c-esultano-tifosi-squadra-sassari-3-agosto-2022/
