“Su ministru de is Esterus Luisu Di Maio, in guerra prena, at ascurtau is sirenas de su sistema e at provau a sfundai su Movimentu, ma non ce dd’at fata”.

Ddu at nau su “leader” de is Steddaus Giusepu Conte chistionendu, in video cunferentzia, cun is ativistas de sa Sardigna chi si funt atobiaus in Tramatza: “Calencunu non s’arregodat po is principius e is valoris chi at cumbatiu, ponendudeddus a un’ala. C’est chi depit sa bonasorti in politiga a su Movimentu e in custas oras cicat logu in atrus partidus politigus”.

Su presidenti beciu de su Guvernu at fueddau de is propostas de su centrumanca e de su centrudrestra po is eletzionis politigas de su 25 de cabudanni: “Su problema de is giovunus no ddu ponis a una parti tassendu sa genti chi tenit prus dinari e donendu una doti a is piciocheddus chi lompint is dixiot’annus – at aciuntu arregodendu sa pensada de su segretariu de su Partidu Democratigu Erricu Letta –. E chini at lompiu is dixianoi in susu? Is giovunus non bolint una doti, bolint sa spera po su benidori, bolint oportunidadis de trabagliu, non su trabagliu de una dì o de una cida”.

“Po non nai de sa drestra, seus a is sciollorius – at acabau – Giorgia Meloni bolit fairi pagai is giovunus chin non bolint fairi trabaglius pagaus pagu e precarius. Nemancu in is Stadus chi ant tentu una ditadura ddu ant mai pensau. Orroba de macus de averas”.

Finas Renzi at nau sa sua, in televisioni cumbidau in su programa “Mezz’ora in più” in su terzu canali: “Deu non soi cun Salvini e Meloni, ma non soi nemancu cun Fratoianni e Di Maio. Chi est custu cussu chi si ndi depit pesai deu soi a su centru. De fatu chi in su centru, comenti tengiu in spera, ddu at airi atra genti, eus a biri”.

Renzi at nau ca Italia Viva fueddat a su centru, chistionendu duncas cun chini tenit is matessis pensadas a partiri de Azione: “Carrulu Calenda est pensendudenci, nosu ddu arrespetaus. Non ddu biu alleu cun Fratoianni. A chini narat ca is votus non si donant a is partidus piticus, nau sempiri ca funt is partidus piticus a cumandai”.

 

 

 

 

Màuru Mura

 

 

1 de austu de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.ilriformista.it/ultimatum-di-renzi-a-conte-o-dice-di-si-al-piano-ciao-o-italia-viva-esce-dal-governo-185513/