Cincu dis in Scotzia, terra acapiada a s’arregodu de sa mama, de intregai massimamenti a su pasu e a is afairis de issu etotu, lassendusì a is palas cussu chi est sussedendu in is Stadus Unidus e in totu s’rrestu de su mundu. In prus, Donald Trump, at finas atobiai calencunu diplomaticu, ma chena formalidadis. S’est aici giai oberta sa bisita privada de Donald Trump in sa natzioni prus a sus de su Regnu Unidu, cumentzada cun su lompimentu in pissu de su Air Force One. Candu nd’est calau in s’aereporu Prestwich in Glasgow, inderetura at fueddau comenti fait in totue: “Dda depeis acabbai de fraigai is palas eolicas, seis ponendu a un’ala sa bellesa de is Natzionis de bos atrus”, is fueddus de su presidenti de is Stadus Unidus. Po cantu pertocat is datzius e s’atobiu, chi giai si connosciat, de is dis benienti cun Ursula von der Leyen, at nau: “S’acordiu cun s’Unioni Europea at essu cussu prus mannu de totus”.
In su stentamentu in terra scotzesa, Trump at finas atobiai su primu ministru laburista Keir Starmer, chi de Londra at a lompiri. E finas cun su “first minister” de su guvernu de su guvernu de su logu, John Swinney, chi est a intru de unu partidu – su Snp, indipendentista e progressista – chi in su tempus passau fut contras de Donald Trump, ddu at a acumpangiai in su caminu giai de su lompimentu.
Is atobius, giai decidius, in calechisiat manera ant essi possius mudaus in is dis, ca su presidenti de setantanoi annus est personi chhi non si castaiat meda a sa cosa giai bogada a piglu. Trump s’at a moviri de is dus albergus comporaus de sa famiglia sua: cussu de Tunrnberry, in sa Contea de su Ayrshire, e cussu de Menie, in su Aberdeenshire, aunia at a batiai, su treixi de austu, unu campu de golf mannu a sa spantada. Sigomenti no est unu viagiu uficiali, Trump no at atobiai manuc a Rei Carrulu de Tres ma, su matessi ddu at atobiai in Londra in su mesi de cabudanni.
Màuru Mura
Giobia su binticuatru de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.corriere.it/politica/25_luglio_26/trump-contestato-scozia-1949aea1-1a2d-40ce-b4ec-0468266c2xlk.shtml
