Cussa de sa Torres de eris in Pontedera non funt in madas chi si dda’aspetaiant. Po duas cosas massimamenti: sa de unu est ca mancaiant giogadoris medas a s’allenadori Greco, sa de duas est ca at giogau sa parti de unu de sa partida in manera sunfria. Ma non po custu is piciocus sassaresus si funt arrendius e a pustis essiri torraus in is spogliatoius cun s’arresurtadu de 0-0, in sa parti de dus, in s’ingiriu de otu minutus ant fatu dus gol, cun Scotto e Zambataro. A nudda est serbiu su gol de is toscanus cun Ganz, candu sa partida fut acabbendu.
A pustis custus tres puntus non mudat nudda in sa parti arta de sa classifica, ca totu is cincu scuadras chi si ddue agatant ant bintu chena. Ma sa partida prus tostada fut de averas cussa de sa Torres e custu donat una spera manna po su benidori. Prus che a totu poita, a pustis airi frimau su caminu spantosu chi fut fendu, is sassaresus ant torrau a pigai s’andala de is partidas bintas. Custa est sa de tres de sighiu in is urtimas dexi dis de friargiu. Difatis su trexi de custu mesi, candu ndi lompiat de tres partidas legias e perdias, ant torrau a binciri cun sa Lucchese po 2-0, foras de domu, dapoi su dominigu sighenti cun su Perugia in tatari e immoi, eris, sempiri in Toscana ant allonghiau sa filera. Sabudu a su Vanni Sanna de Tatari lompit su Pescara in dd’una atra partida dificili, ma sa Torres in custu campionau spantosu non timit e bolit sighiri a spantai is tifosus.
Sa classifica po s’ora bit su Cesena in conca cun 71 puntus fatus, dapoi sighit sa matessi Torres cun 51 e de sighiu sa Carrarese cun 52, su Perugia cun 9, su Gubbio cun 47 e su Pescara cun 44.
Chi sa Torres si podit allirgai, s’atra scuadra sarda de sa Serie C, s’Olbia, s’arriolat. Est in basciu e a suta ddue tenit feti un’atra scuadra. Tocat a cumentzai a binciri.
Màuru Mura
Sabudu, su binticuatru de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=2CRIrPDVIps
