Su primu ministru de s’Israele, Benyamin Netanyahu, intru de una bisita in su spidali Soroka, bçddiu de unu missili iranianu, at nau ca “dogna omini o femina israilianu funt sunfrendu e paghendu unu pretziu mannu” de is atacus cun is missilis de parti de s’Iran. “S’agatat genti chi est morta, familias intreas chi funt prangendu is mortus insoru, dd’apretziu meda”, at nau. Su matessi Benyamin Netanyahu at aciuntu ca finas sa familia cosa sua est paghendu is “arregionis” de sa guerra.
Difati, su figliu de su primu ministru non si podit cojai: “Po sa borta de duas, figliu miu Avner at depiu mudai sa dì de coja e non s’est possiu cojai. totu po mori de s’amelessu de is missilis iranianus. Custu est su pretziu chi est paghendu issu, sa sposa sua e totu sa familia mia”.
Sa coja, chi depiat essiri lunis passau, po immoi non si fait po mori de su cumentzu de sa guerra intru de Israele e Iran. Sa matessi coja de Avner Netanyahu cun sa sapntosa po bellesa Amit Yardeni, chi si depiat fairi in dd’unu de is logus prus erricus de Israele, dda iant criticada meda cussus chi in Israele funt contras de sa politica de su matessi primu ministru. Cuasi inderetura, a pustis chi si funt connotus is particolaris, totus ant tentu de eita nai po s’ora de si cojai e de comenti ddu bolint fair candu sa Natzioni de Israele tenit atru a su cali pensai. Et, est a nai, ca is ostagius sighint a abarrai in Gaza. Calencunu, de cussus chi funt contras a Netanyahu, fut finas pensendu de portai strobu a chini fut festendu, ma mmoi sa guerra cun s’Iran at mudau totu.
Certu ca tocat a tenni una faci de sola, candu si ponint a sa matessi manera is suferentzias de sa genti chi prangint mortus cun dd’una coja chi si podit fairi in atru tempus. E chena de fueddai de sa genti palestinesa speddutzada in totu custu tempus.
Màuru Mura
Cenarba, su binti de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.tgcom24.mediaset.it/mondo/netanyahu-figlio-nozze-rimandate-annullate_100009885-202502k.shtml
