Donald Trump fait sciri de “essiri inchietu meda” cun Vladimir Putin e amelessat de ammanniai a su 25% is dazius in pissu de su petroliu russu chi non s’at a lompiri a unu acordiu de pagi po sa guerra intru de Russia e Ucraina. Chi su presidenti de is Stadus Undidus non siat allirgu si cumprendit beni meda e craramenti in sa ciaciarrada cun sa NBC, intru de sa cali Trump si dd’at pigada contras de su presidenti russu po airi cicau de ponni in strobbu a Volodymyr Zelensky, chistionendu de unu guvernu de s’ora e unu presidenti nou po s’Ucraina.
“Chi deu e sa Russia non ce dda eus a fairi a lompiri a unu acordiu po frimai su sanguni in Ucraina e chi deu iat depiri pensai ca sa curpa est de sa Russia, tandu apa a ponni dazius ancora prus mannus po totu su petroliu insoru”, ha spiegau, nendu finas ca Putin connoscit beni s’inchietu chi dd’at fatu pigai. E nendu ca s’ant a torrai a intendiri in custa cida etotu.
Finas chi su presidenti at umperau fueddus tostaus cunforma a Putin e amelessendu, comenti eus giai nau, s’ammanniamentu de is daziu a intru de unu mesi, chi po sa Russia iat essi unu disacatu mannu, Trump at arregodau, a dogna manera, ca intru de issu e Vladimir Putin is relatas funt bonas meda. At aciuntu ca s’inchietu cosa sua iat a podiri sparessiri inderetura feti chi su presidenti russu “fait sa cosa giusta”.
In is dis passadas sa Russia cun s’Ucraina funt lompias a unu acordiu po fairi acabbai su fogu chi ndi bessit de is armas, sonumancu po cussu chi pertocat su caminu de is navis in su Mari Nieddu. S’acordiu est postu in duda de is curpas chi partint de una parti e de s’atra. “Sa Russia est allonghiendu sa guerra. Nos aspetaus un’arrespusta de is Stadus Unidus, de s’Europa e de totu is amigus nostus po totu cussu chi sa Russia est fendu a sa genti nosta”, at nau su presidenti ucrainu Volodymyr Zelensky, fueddendu de is atacus russus chi sighint.
Màuru Mura
Martis, su primu de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.avvenire.it/mondo/pagine/putin-trump-la-telefonata-e-servita-per-avviare-la-grande-spartizione
