“Feus is passientzias a sa familia, ma aspetaus chi bengiat a pigliu sa beridadi. Non tocat a pigai fueddu finas a candu non s’ant agatai provas”.
Custus is fueddus de sa Lega po cantu pertocat Alexei Navalny. A ddas nai est su numuru dus de su partidu, Andria Crippa.
“Deu non tengiu sa beridadi in buciaca e non sciui eita sussedit in Russia. Mi pregontu comenti facant a ddu sciri innoi in Italia. Su Partidu democratigu tenit sempiri pensadas giustitzialistas”.
A chini ddi pedit chi is cunditzionis de impresonamentu de Navalny apant possiu agiudai sa morti, arrespundit aici: “Chi istaiat beni finas a duas dis a innantis, bolit nai ca is cunditzionis furint bonas. Chi narais ca funt tostadas is presonis russus iat essi depiu stai mali de prima. O forsis in is urtimas duas dis est mudau totu. Non ddu sciu”.
A pustis cun dd’unu paperi, sa Lega cicat de cambiai is fueddus de Crippa: “SA morti de Alexei Navalny est de arriolu mannu. Si depit pediri sa beridadi. A totu su partidu, cumentzendu de Mateu Salvini dispragit e pensa a su dolu de sa familia”.
Ma non acabbat aici. Su Pd atacat: “Fueddus chi parint bessiri diretamenti de su Cremlino. Garantismu non de sa parti de Navalny, impresonau finas a morri po is ideas suas, ma de sa parti de unu stadu criminali. Sa Lega si ndi tirat sa faciola a sa sola. Funt ancora e sempiri cussus cun sa felpa de Putin”, is fueddus, custus, de Pepi Provenzano.
Finas is Birdis, cun Angilu Bonelli no abarrant mudus: “Is fueddus de Crippa, parint bessius de sa buca de Mateu Salvini. Funt fueddus chi non podint essiri ascurtaus e de bregungia. Funt, ateretantu, fueddus chiamostant comenti sa Lega est a su costau de su poderi de Putin, chi non bolit fairi inchietai. Tocaiat a nai ca Navalny, impresonau in dd’unu presoni de su ingiriu articu est stetiu bociu de is cunditzionis de presonia”.
Màuru Mura
Sabudu, su bintitres de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.repubblica.it/politica/2022/09/11/news/matteo_salvini_lega_papeete_putin-364929634/
