“Est de su tempus de candu fustis incungiaus in domu po sa pesta de su Covid chi is caminus casteddaius non benint samunaus”. Cumentzat aici su sindigu Massimu Zedda intru de s’atobiu cun is giornalistas de eris, in su cali at amostau su progetu, in pissu de sa pulitzia de sa capitali sarda “Casteddu, citadi limpia”. “Pensai ca immoi is caminus funt de cuatr’annus prenus de pruini e cussu chi abarrat ddu respiraus nosu”.
Est cumentzau eris in su noti, in sa zona de sa Marina e in parti de su centru storicu, su progetu nou de pulidura cun s’mperu de machinas sperimentalis cun cisternas e lancias a pressioni manna e forti chi ant a permitiri una pulidura funduda de is caminus casteddaius. Sa nova, bona, est ca non at a serbiri a ndi tirai is machinas de is parchegius in su mentris chi si samunant is orrugas, difatis s’at a puliri finas a suta de is machinas etotu.
“Pedeus s’agiudu de totu is citadinus de Casteddu”, funt is fueddus de Luisa Giua Marassi, assessora a s’Ecologia Urbana, Ambienti e Birdi pubricu. “Ndi eus pesau unu numuru de su telofunu a dispositzioni e erriceus segnalatzionis in totu is canalis nostus. Seus trabbagliendu finas po abbasciai de binticuatru a ses oras su tempus po sa pulidura de emergentzia. Sa spera est de ce dda fairi in totu”.
“Mancant is incentivus a sa popolatzioni e a is atividadis cumercialis”, aciungit su sindigu Massimu Zedda, chi pensat a premius po is citadinus prus Impegnaus in sa chistioni: “Unu esempiu iat podit essiri a nde ddis tirai sa Tari”.
Calencuna dificoltadi in su poderamentu de sa pulitzia de certas zonas, comenti is caminamentus nous de s’orruga de Trieste. “Po puliri de is orrestus de is sigaretas de sa giarra iat a serbiri unu trabagliu a manu o s’umeru de resinas particolaris, chi perou podint essiri tossicasa po is matas chi ndi funt stetias pesadas”.
Màuru Mura
Martis, su trinta de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.comune.cagliari.it/portale/page/it/cagliari_citta_limpia_al_via_la_pulizia_straordinaria_di_strade_e_marciapiedi?contentId=NVT184480
