Calat su numuru de is studentis in Sardigna, comenti de dex’annus a cust’ala: funt cuasi 177 mila. In su 2014-2015 furint 212 mila. Eris sa Segunda comissioni, ghiada de Camilla Soru de su Partidu Democratigu, at sighiu a ascurtai is parrer po aprontai una lei in pissu de sa filera scolastica sarda, boddendudendi is chistionis de su diretori de s’uficiu scolasticu regionali, Franciscu Feliziani e de sa presidenti de s’Anci Taniela Falconi.
Feliziani at amostau, prus o mancu, sa situatzioni de sa scola sarda, partendu de is numurus chi scoviant unu calamentu de is autonomias scolasticas, chio ant a passa de ocannu a ocannu chi benit de 234 a 225, e de su numuru de is discientis, passau de is 212.000 de dex’annus a immoi a is 176.839 de ocannu chi benit.
In percentuali, at nau su diretori de s’uficiu regionali, su calamentu est de su 17%, ma, at aciuntu no est calada sa genti chi trabbagliat in is scolas chi funt bintimila insegnantis, setimila insegnatis de agiudamentu a is calis s’aciungint is setimila e cincuxentus cun funtzionis de diretzioni in s’aministratzioni.
Sa diretora de s’Anci, Falconi, at torrau a nai ca tocat a ponni in mesu is Entis Localis e at postu s’indicu, comenti de cosa primaria, de ponni a un’ala su fueddu “dimensionamento” candu si chistionat de istrutzioni. Sa poberesa de s’educatzioni e su lassamentu de sa scola funt is cuntierras chi si depint binciri, pensendu ca su 35% de is studentis creint ca sa preparatzioni de sa scola est sempiri peus e ca a lassai sa scola est su 40% de is discientis. Is obietivus de sa lei in pissu de sa scola sarda, po s’Anci, depint essiri cussu de garantiri su diritu a su studiu in dogna parti de sa Sardigna; fairi calai is numurus de dispersioni e lassamentu e fairi cresciri su numuru de is diplomanus e de is laureaus.
Màuru Mura
Giobia, s’undixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.orizzontescuola.it/in-sardegna-approvata-la-legge-sulla-lingua-sarda-si-insegnera-la-sua-storia-a-scuola/
