Immoi est uficiali. S’allenadori romanu ddu at scoviau a sa sociedadi e a is tifosus a pustis chi at sarvau sa scuadra de sa serie B, in manera spantosa e candu nemus ddue creiat, dominigu passau in Regiu Emilia contras de su Sassuolo. Si serrat aici unu contu de amori, longu trintases annus aunia Ranieri at fatu bessiri su Casteddu una borta de sa Serie C a sa Serie B e atras duas bortas de sa Serie B a sa Serie A. Ma non feti, ca funt de arregodai is duas dortas chi at sarvau sa scuadra: ocannu e in su 1991!
In is canalis social de su Casteddu est stetiu postu su videu aunia s’allenadori saludat: “Su caminu miu est cumentzau in su 1988. Tres annus spantosus, a pustis mi ndi soi andau e soi diventau mannu. Immoi agaut chi siat lompia s’ora de mi nd’andai, dapoi de un’atra promotzioni, chi forsis non si aspetiaus aici inderetura candu soi erribau ocannu passau in gennargiu, e a pustis airi sarvau sa scuadra. Est una decisioni sunfria, tostada, pigada cun su coru tristu, ma est giustu a ddu fairi immoi. Prefergiu a mi nd’andai aici ca bogliu lassai un’arregodu galanu”.
Ranieri scoviat finas ca ocannu passau, a innantis de torrai po sa borta de sus, ddu ant cunvintu is fueddus de Gigi Riva: “Eja timia a torrai, massimanenti po non amaciai is tres annus passaus innoi chi m’iant prenu su coru. In su tempus de dificoltadis pensaia sempiri a Casteddu e a Sardigna. Non bolia torrai po non orrovinai totu. A pustis candu apu ligiu is fueddus de Gigi Riva, ‘Claudiu est unu de nosu’, soi torrau. Mi soi nau de lassai a un’ala s’egoismu e dde erriscai. Ma immoi est torrau su tempus de nosi torrai a lassai”.
“Sa spera manna est de essiri arregodau comenti de una personi positiva, chi at pediu agiudu a is casteddaius e a is sardus”, sighit Ranieri. “Est a nai ca chena is tifosus soi seguru ca no andaiat a finiri aici. Nosi funt stetius a su costau, nos ant sempiri sulau a is palas e ant sempiri cretiu a is fueddus mius! De totu custu bosi torru gratzias ca mi eis fatu passau un’annu e mesu de spantu. Giobia cun sa Fiorentina at essi s’urtima partida e bos apa imbrassau totus”.
Màuru Mura
Mercuris, su bintidus de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.fantacalcio.it/news/calcio-italia/21_05_2024/claudio-ranieri-lascia-la-panchina-del-cagliari-ed-il-calcio-461236
