Sighit chena de pasiu su trabbagliu de Davide Nicola cun is piciocus de su Casteddu in Chatillon, in sa Baddi de Aosta, aunia si ddue agatant de prus de una cida. Po aprontai sa scuadra, chi at a cumentzai a gherrai in su campionau de ocannu chi benit a pustis de Mes’austu, tocat a trabbagliai meda e totu sa truma casteddaia ddu est fendu cun gana e sabidoria.

Eris, a is seti de merì, in su stadiu Perucca de Saint Vincent, chi s’agatat a su cumentzu de sa Baddi de Aosta, su Casteddu at giogau una partida, intru de amigus chi serbit feti po biri comenti funt andendu is chistionis, contras de su Catanzaro chi ocannu passauest lompiu a is finalis po ci giumpai in serie A e ocannu at mudau allenadori, de Vivarini s’est passau a Fabiu Caserta.

Su Casteddu at bintu sa partida, a pustis chi iat perdiu sa cida passada cun su Como, po dus a zeru. Curiosidadi est ca a fairi is dus gol funt stetius Lapadula, in sa parti de unu, e Pavoletti, in sa parti de dus: is “becius” non traigint mai e si faint agatai sempiri prontus.

Difatis, dapoi de cincu minutus, su Casteddu at fatu gol cun s’italu-peruvinau chi est stetiu bravu a ponni sa bocia a is palas de Pigliacelli. Su passagiu si dd’at fatu Marin.

Davidi Nicola at fatu cumentzai sa partida a cincu de is ses giogadoris nous: is tres lompius de s’Atalanta, est a nai Zortea, Adopo e Piccoli, e Luperto cun Felici, chi funt lompius de s’Empoli e de sa Feralpi Salò. Finas su Catanzaro, a dogna manera, at postu in campu is giogadoris comporaus ocannu: Piras, Compagnon, Bonini, Pagano e Pigliacelli.

Is sa parti de dus de sa partida, a pustis mesoredda, at segnau Pavoletti, mancu a ddu nai de conca, et est imbucau finas su portieri albanesu Sherri, lompiu de tempus pagu in sa scuadra de Nicola. A dogna manera est stetia partida chi et serbia a Nicola cun Caserta.

Is urtimas novas de su mercau narant ca su Milan iat a bolli su portieri Scuffet po ddi fairi pigai su postu de Sportiello chi s’est strupiau. Chi iat depiri sussediri su Casteddu iat depiri cicai unu portieri nou. E si cumentzat giai a chistionai de Silvestri de s’Udinese.

 

 

 

Màuru Mura

 

 

 

Mercuris, su trintunu de mesi de orgiolas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.youtube.com/watch?v=SMVIcA6O61I