Fut unu Casteddu postu paris a s’urtimu cussu, ca mancaiant una bona pariga de giogadoris, cussu calau in campu eris a is cuatru de pustis prangiu, contras de sa Roma de Ranieri. A dogna manera su Casteddu si dd’at giogada a faci manna, finas chi at perdiu po 1-0, gratzias a su gol de Dovbyk. “Su Casteddu at giogau una partida beni meda e sa Roma at bintu feti poita tenit calidadi manna”, is primus fueddus de Davidi Nicola, s’allenadori castddaiu chi at agradessiu sa manera de giogai de is piciocus chi at postu in campu. “Su gol insoru est sussediu po casualidadi e ddu depeus cumprendiri, ma deu soi cuntentu po comenti eus giogau giai candu nosi depiaus difendiri e giai candu depiaus essiri perigulosus candu atachiaus. Ddu torru a nai soi cuntentu meda po comenti is piciocus ant giogau, difati a s’acabbu de sa partida si ddus apu nau”.
E po donai fortza a is chistionai bogadas a pigliu de Nicola, est finas a nai ca su giogadori meglius de sa Rama est stetiu su portieri Mile Svilar. “Candu parat fait su propriu doveri”, sighit a nai s’allenadori. “In sa parti de unu podiau fairi a malus cun Zortea ca depiat poderai sa bòcia prus bascia. Non podeus fairi totu sa partida in sa parti de campu de sa scuadra nemiga, massimamenti contras sa Roma, ma, a dogna manera, tocat a tenni prus calidadi. Eus a cicai de ddue trabbagliai intru de sa cida”.
In sa serrada, Nicola fueddat de s’atobiu cun Claudiu Ranieri, chi in Casteddu at amostau contus de spantu: “Nosi seus saludaus cun sinceridadi, est unu allenadori chi apu sempiri apretziau. Ma, prus che a totu a su cumentzu de su conutu miu cun su Casteddu e candu Ranieri fut frimu e seguru de airi acabbau de allenai, nosi seus intendius, prus de una bia, po calencuna pensada. Creu chi oi apat bidu unu Casteddu aprontau beni chi at arriolau a sa Roma”.
Màuru Mura
Lunis, su dixiaseti de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=CL_Go3SCB3Q
