In Londra s’urtimu saludu a sa Reina Elisabeta II, a pustis de undixi dis de sa morti a norantases annus de idadi. Totu est andau comenti depiat e su tzerimoniali est acabbau de fatu de trexi oras, cumentzau a is ses e mesu de mengianu (is seti e mesu italianas) de candu ant serrau s’aposentu aunia s’agataiat su corpus de Elisabeta II.
Una cosa spantosa est su numuru de chini at sighiu totu in sa televisioni e in streaming: prus de cuatru miliardus de personis. In Londra, in is orus de sa cresia de Westminster, unu muntoni de genti chi non fait mancu a ddus contai.
Ddue funt totu is mannus de sa Terra: de Joe Biden cun sa pobidda Lady Jill a Sergiu Mattarella cun sa figlia Laura; de Macron cun sa pobidda Brigitte a su presidenti tedescu Frank Walter Steinmeier. E galu, is imperadoris giaponesus Naruhito e Masako, is capus de is Stadus de su Commonwealth, is familias realis de Spagna, Norvegia, Svezia, Danimarca e Monaco. Medas capus de Stadus e ambasciadoris. Mancaiat su presidenti cinesu, cumbidau, ma ddue fut su numuru dus de sa Cina Wang Qishan. No ant erriciu cumbidu invecias sa Russia, s’Afghanistan, sa Bielorussia, sa Birmania, sa Siria e su Venezuela.
Fut de candu si fut mortu Winston Churchill, in su 1965, chi in Westminster, ma fintzas in totu su mundu, non si biat una cosa gasi. Su interru est lompiu de fatu dexi dis de sa morti aunia “genti a cracadura” comenti at nau su Rei Carlo III, ant amostau totu s’amori po sa Reinsa e po sa familia “fendunosì cumprendiri ca funt a su costau nostu”.
Sa Reina est stetia interrada in sa capella de St George, a su costau de su casteddu de Windsor. Elisabeta II imoi est in pagi in una capella de sa cresia, sa King George VI Memorial Chapel, acanta de su pobiddu Filipu, de su babbu Giorgio VI, a sa mama e a sa sorri, sa principessa Margaret. Po cussu chi narant is giornalistas ingresus in sa losa ddu est scritu: “Elizabeth II 1926-2022”.
Màuru Mura
Su binti de Cabudanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.fanpage.it/attualita/chi-ci-sara-ai-funerali-della-regina-elisabetta-i-paesi-che-partecipano-e-gli-esclusi/
