“Is cincu puntus chi teneus in prus de sa Cremonese e is cuatru de su Lecce, nosi permitit de tenni su distinu in is manus nostas. No apu mai fatu tabellas e non cumentzu, de seguru, oi a ddas fairi. Depeus ponni prus puntus in sa classifica e chi ddus feus non s’arriolaus po nudda”. Fabiu Pisacane andat prus addei de is dificultadis chi podit tenni chin’est a suta, e connoscit s’importu de sa partida, cun s’Atalanta, de custu mericeddu. Partida de importu mannu de averas est custa, ca su Casteddu si dda podit giogai giai connoscendu is arresurtaus de sa Cremonese e su Lecce. Intru de eris e dì innantis, giai sa scuadra lombarda e giai cussa pugliesa no ant bintu. Sa Cremonese nd’est torrada de Napoli cun cuatru gol pigaus e manc’unu fatu, su Lecce, invecias, de Verona nd’est bessiu cun dd’uu puntu. E duncas, mali chi andit, su Casteddu chi perdit s’at a agatai sempiri a cincu puntus stesiau, ma cun dd’una partida de mancu de giogai. Chi ndi buscat unu puntu, ant essi ses cussus de vantagiu, ma chi ndi buscat tres totu paris s’at a podiri nai ca su Casteddu est sarvu, poita ca otu puntus in prus, candu mancant comenti eus nau cuatru partidas, est cosa segura po ocannu chi benit a s’agatai in Serie A.
Cali Atalanta s’aspetat, a pustis chi sa Latzio ce dd’at bogada de sa Coppa Italia? “Tocat a biri comenti s’intendit: podit essiri unu corpu mannu, ma finas chi totu custu inchietu si fraighit in energia. Nosu, a dogna manera, nosi seus preparaus tentendu in contu s’Atalanta meglius. Difati sa scuadra bergamasca est prus forti de cussa chi s’est amostada in sa partida de Bergamo.
Po cantu pertocat is giogadoris, Pisacane at nau ca “Teneus a Dossena chi tenit is matessi carateristicas de Mina, duncas chi giogat unu, non giogat s’atru”. De Zappa: “In custas partidas, o de su cumentzu o chi imbucat, at essi unu chi nos at a donai unu agiudu mannu”. E Kilicsoy? “Custa cida at postu prus gana e m’at fatu prageri meda”.
