De sa Roma a su Como, galu in domu, in sa Unipol Domus, e galu cun su stadiu totu prenu che un’ou. Su Casteddu sighit su caminu in sa cica de s’identidadi sua, “cussa chi, immoi”, narat Nicola, “contat prus de totu, finas prus de comenti acabbat sa partida”.
Torrant a disponimentu Mina cun Viola, c’est finas Palomino chi tenit sa spera de giogai de su cumentzu. Abarrant foras Zortea (“ma de martis at essi a intru”, spiegat s’allenadori casteddaiu) e Makoumbou, uficialmenti po is carrigus de trabbagliu, ma forsis po mori de su mercau ancora obertu.
E po cantu pertocat su mercau, Nicola ddu narat craru e tundu: “Non teneus dudas manna poita su 70 po centu de su trabbagliu, sa sociedadi ddu at fatu a innantis. Mancumali ca est pagu cussu chi ancora non teneus. A dogna manera iat essi meglius chi su mercau duressit prus pagu”.
Su Casteddu custu mericeddu torrat a agatai su Como de Fabregas a pustis de unu mesi de sa partida, chi non baliat nudda, in Chatillon: “Est passau feti unu mesi, ma parit atesu meda de averas. Atobiaus una scuadra chi est dificili a nai ca est apena bessia de sa Serie B. Est una scuadra chi at essi dificili meda de atobiai po totus, poita ti fait mudai sa manera de giogai. Est una partida chi nosi permitit de andai a innantis a cicai s’identidadi nosta”.
Is undixis chi ant a calai in campu po su cumentzu de parti casteddaia iant depit essiri: Scuffet, Zappa, Wieteska, Luperto, Azzi, Deiola, Prati, Marin, Augello, Luvumbo e Piccoli. Cussus chi s’ant a setziri a su costau de Nicola po essiri prontus a imbucai: Sherri, Iliev, Hatizidiakos, Palomino, Mina, Obert, Makoumbou, Adopo, Felici, Lapadula, Kingstone, Jankto, Pavoletti, Viola e Pereiro.
De parti comasca invecias: Reina, Iovine, Goldaniga, Barba, Moreno, Strefezza, Braunoder, Engelhardt, Da Cunha, Cutrone, Belotti. Setzius a su costau de s’allenadori spagnolu Fabregas: Audero, Vigorito, Sala, Dossena, Verdi, Gioacchini, Gabrielloni e Cerri.
Màuru Mura
Lunis su bintises de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://sport.virgilio.it/dirette/live/serie-b/14-1-2023/cagliari-como/2314311/
