Si pesat, fintzas chi de pagu, sa rapresentantzia de is feminas sardas in su Parlamentu italianu, a pustis is eletzionis de su 25 de cabidanni passau. Cunfromma a sa torrada de su 2018, difatis, candu sa Sardigna fut rapresentada de seti feminas intru binticincu parlamentaris, chi boliat nai su 28%, immoi is deputadas e is senadoras sardas funt cincu in pissu de seixi, chi bolit nai su 31,25%.
Is senadoras chi ant bintu una cadira in su Senau funt Antonedda Zedda de is Fradis d’Italia cun Sabrina Licheri de is Steddaus; is deputadas chi ant a setziri in Montecitorio invecias funt Barbara Polo, sempiri de is Fradis d’Italia, Francisca Ghirra de is Birdis e Manca e Alisandra Todde de is Steddaus.
Fradis d’Italia e Cincu Steddas, cun duas feminas bincidoras, funt duncas is partidus cun prus feminas eligias, ma in su mentris fait spantu ca sa Lega, Fortza Italia e su Partidu Democratigu non ce dd’ant fata a ndi portai peruna.
Sa rapresentantzia de is feminas sardas in Parlamentu est in linea, antzis pagu pagu de prus, cun cussa natzionali. In custu casu sa percentuali giusta est de su 31%, centuotantases feminas intru sexentus parlamentaris, is ominis funt duncas cuatruxentu e catodixi. S’est abasciada sa percentuali chi si castiat sa legisladura de a innantis e custu fait calai s’Italia puru a basciu de sa media europea de is feminas eligias in is guvernus de is atrus Stadus chi est de su 32,8%.
Su numuru sardu si stesiat, invecias, de cussu natzionali po sa distributzioni de sa rapresentantzia de is feminas a intru de is partidus: chi is s’orrestu de s’Italia is Fradis d’Italia si poderant cussa prus bascia, cincuanta in pissu de centuotantacincu eligius, in Sardigna ce dda fait a ponni una senadora, Antonedda Zedda, e una deputada, Barbara Polo, in pissu de seti bincidoris.
Màuru Mura
Giobia, su 6 de Santu Gaine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.linkiesta.it/2019/10/diritto-italia-leggi-legnini/
