S’allenadori svedesu est mortu eris a mengianu in sa domusua ingiriau de sa genti chi ddi boliat beni. Eriksson, chi in Italia at trabbagliau po sa Latzio, sa Sampdoria, sa Fiorentina e sa Roma, in su mesi de gennargiu passau iat scoviau a totu de essiri malaidu de cancru e ca, in sa pensada meglius, dd’abarraiat de biviri giustu un’annu.
“Apu tentu una bella vida, forsis finas tropu bella. E po custu si depit pagai”, is urtimus fueddus de s’allenadori in sa “docuserie” bessia de pagu e intregada a issu, cancu at chistionau de su cancru chi ddi fut stetiu agatau de calencun’annu a custa parti. “Totu is ominis timint a sa morti, ma sa vida pertocat finas sa morti – is fueddus postus in evidentzia finas de su Daily Mail –. Sa spera chi tengiu est chi s genti possat nai ca fui unu brav’omini. Ma sciu giai ca non totus ddu ant a nai. A dogna manera bogliu chi m’arregodeis comenti de unu piciocu chi at sempiri cicau de fairi totu su chi podia”.
Eriksson est stetiu su strangiu de unu a airi ghiau sa scuadra natzionali de s’Inghilterra, e at acapiau po sempiri su nomini cosa sua a su fubalu britannicu. Ma est stetiu finas unu grandu allenadori de Serie A. In Italia est lompiu in sa metadi de is annus Otanta in sa Roma, aunia s’est acostaiu meda, massimamenti in su 1986, a su scudetu. In segus, a pustis airi ghiau sa Fiorentina e sa Sampdoria, est passau a s’atra parti de su Tevere. E cun sa Latzio de Cragnotti at bintu unu scudetu spantosu in su 2000, su de dus de sa storia de sa scuadra latziali. Cun sa Latzio at finas bintu finas atras duas copas e nd’at perdiu una contras de s’Inter de Ronaldo.
Dapoi at cumentzau a girai su mundu de s’Arabia a sa Cina a sa Thailandia. At trabbagliau po atras scuadras natzionalis, difatis a pustis s’Inghilterra at ghiau sa Costa de Avoriu, su Messicu e is Filipinas.
Màuru Mura
Martis su bintiseti de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.repubblica.it/sport/calcio/2024/08/21/news/eriksson_lazio_messaggio_calcio_malattia-423455831/
