Faci a faci intru de su governadori de sa Regioni Sarda Christian Solinas e su ministru, e fintzas numuru dus de su Guvernu, a is Infrastruturas Mateu Salvini po fairi contu in pissu de digas, ferrrovias e finas po su gap chi ponit sa Sardigna a palas de atras regionis medas de s’orrestu de s’Italia.
Is chistionis cicadas in s’atobiu, a innantis de totu, sa situatzioni de is digas, cun – si spiegat in d’una nota uficiali – “Novas bonas po cussa de Cumbidanovu frima de annus e annus po sa cali est stetiu agatau su dinari po cumentzai is apaltus de is trabbaglius prus urgentis. Funt giai trintotu is milionis agataus, aspetenduru de tenni atru dinari, chi seus segurus ant a lompiri”.
Atru tema cicau in su atobiu est cussu de is ferrovias e, prus in generali, de su gap infrastruturali chi ponit s’Isula in is urtimus postus de totu is regionis italianas. Chistionis in pissu de is calis Salvini e Solinas si funt postus de acordiu po “si torrai a intendiri coidendu po biri chi ddu at atras novas”.
De su ministeru ghiau de su leghista, si narat ca “teneus sa disponibilidadi massima po cicai de sblocai operas publicas prus possibilis”, obietivu custu chi agatant de acordiu su ministru cun su guvernadori. “In pressi – garantint de Casteddu – eus a tenni novas de importu mannu”. “Sa nostra, cun cutu guvernu, est una relata forti, in s’interessu mannu de sa Sardigna. Non soi in cica de cadiras in Roma, ma de fairi cosas bonas po is sardus”, cussu chi at nau su presidenti sardu a pustis su faci a faci de Roma cun su Ministru.
“Cun su Guvernu – narat sempiri Solinas – eus postu in campu unu programa chi at a sblocai dinari meda in dogna setori. Si cumentzat cun is digas, e sa nova bona de averas – narat sempiri Solinas – est po sa diga de Cumbidanovu, cantieri chi est frimmu de annus. Immoi su Guvernu nosi garantit su dinari po is trabbaglius primarius, prus o mancu trintotu milionis. C’est finas s’impignu de sighiri sa relata cun su Guvernu po atras operas pubricas chi in Sardigna serbint che-i su pani”.
Màuru Mura
Cenarba s’undixi de Sant’Andria de su 2022
Foto: https://espresso.repubblica.it/plus/articoli/2020/02/12/news/sardegna-lega-matteo-salvini-1.344016/
