Cun sa vitoria de su Brasile de eris a merì contras de sa Serbia est acabbada sa prima giornada de is Mondialis de fubalu in Qatar 2022. Immoi totu is scuadras si funt amostadas e, finas chi galu est acoitu, podeus donai is primus giuditzius po nosi ponni a scumitiri. Calencuna natzionali nos at spantau in bonu e calencun’atra in malu. De is primas podeus nai ca de is scuadras bistas funt in tres chi ant amostau cantu funt fortis: Spagna, chi at batiu po 7-0 su Costarica, sa Francia, chi at bintu cun s’Australia po 4-1 e su Brasile chi eris a bintu beni po 2-0. Po is segundas, cussas chi ant spantau po poberesa de giogu po is giogadoris mannus chi tenint est a nai ca s’Argentina, batia de s’Aurabia Saudita po 2-1 e sa Germania binta de su Giaponi po 2-1 e totu, funt cussas chi ant deludiu de prus. Po comenti dda bieus nosu Francia, Brasile e Spagna tenint calencuna cosa in prus de is atras scuadras. Massimamenti sa Francia tenit totu is paperis po torrai a binciri su mondiali comenti cuatru annus a ocannu: e, lastima manna, ddis mancat giogadoris meda chi de averas podiant fairi sa diferentzia, unu nomini po totus est cussu de Pogba. Ma forsis cussa chi fait prus a timiri de totus est sa Spagna. Giogadoris giovunus chi scint ita est una bocia e dda scint giogai beni meda, curridoris e un’allenadori chi forsis est su meglius a livellu de natzionalis. Su Brasile at dimostrau de tenni gana de binciri e giogadoris chi podint decidiri cun d’una giogada calechisiat partida, ma a bortas si perdint in d’una tassa de abba e si castiant tropu a su sprigu. Seus segurus, a dogna manera, ca chini at a binciri a s’acabbu at essi una de custas tres scuadras.

Fueddus bonus ddus balint massimamenti s’Arabia Saudita e su Giaponi ca cun coragiu, animu e gana de si dda giogai ant spantau, ma prus de andai a innnantis in is otavus non creeus chi ce dda possant fairi. In mesu de is scuadras bonas e malas s’agatant una pariga de scuadras chi podint fairi de prus, ma non funt galu in forma comenti su Belgiu, chi tenit giogadoris fortis aberu, s’Olanda, sa Svitzera e finas sa Serbia ca finas chi eris at perdiu ddu at fatu cun onori.

 

 

Màuru Mura

 

 

 

Cenarba, su 25 de Sant’Andria de su 2022

 

 

 

Foto: https://www.solosalerno.it/2022/11/22/mondiali-qatar2022-minutidirecupero-pierluigicollina-solosalerno/