A dda nai totu is prendas de s’umanidadi de su Cile a totu su 2022 funt seti, ma in su mentris ndi tenit atrus 17 iscritus in sa lista de is candidaduras. Su primu chi est stetiu arreconnotu in sa lista de s’unesco est su Parcu Natzionali de su Rapa Nui, po minescimentus culturalis in su 1995. Est a nai ca su Cile est imbucau in sa Cunventzioni po is prendas de s’Umanidadi feti in su 1980. De su 1995 finas a su 2021 ndi funt imbucaus atrus sesi e atra curiosidadi est ca funti totus po meritus culturalis. Unu est de cumpartziri cun atras natzionis.
Parteus duncas de su primu. Cussu giai tzirmoniau de su 1995: su PArcu natzionali de Rapa nui chi s’agatat in s’Isula de Pasca. Rapa Nui est difatis su nomini indigenu de s’Isula de Pasca e tenit sa testimonia de una fenomenu culturali chi non s’agatat in perun’atra parti. Una civiltidadi de origini polesiana chi si ddue est posta prus o mancu in su 300 a pustis de Cristu e chi at postu in peis una traditzioni potenti, fantasiosa e originali de scultura e architetura monumentali, chi no at tentu peruna influentzia de foras. De su seculu X a cussu de XVi custa comunidadi at fraigau santuarius e figurs mannas in perda connotas cun su nomini de Moai, chi nd’anti pesau unu paesagiu chena ogualis chi sighit a essiri bisitau de sa genti de totu su mundu.
Cinc’annus ant depiu aspetai is cilenus po torrai a biri una prenda de domu insoru a suta s’ala de s’Unesco, difatis in su 2000 funti stetias arreconnotas is cresias de Chiloè chi s’agatant in Castro, Chonchi, Dalcahue, Puqueldon, Quemchi e Quinchao. Is cresias de Chiloè tenint sa particolaridadi, is solas in s’America Latina, de essiri fatas in linna. Sighint una traditizoni cumentzada de sa Missioni Peripatetica de is Gesuitas in is seculus de XVII e XVIII, sighia e erricada de is Francescanus in su seculu de XIX chi addurat finas a immoi.
In su 2003 imbucat a suta is manus longas de s’Unesco su Cuartieri storicu de sa citadi portuali de Valpariso. Custa citadi presentat un’esempiu mannu de svilupu architetonicu de s’acabu de su seculu de XIX in s’America Latina. In sa cornci sua nataurali chi parit unu tiatru romanu, sa citadi est caraterizada de un’urbaniztzioni vernacolare, ddi narant, adatau a is collinas chi amostant campanilis unu diversu de s’atru.
Is rafinerias de salnistro de Humberstone e Santa Laura chi s’agatant in Pozo Almonte imbucant dus annus a pustis de sa citadi de Valpariso, in su 2005. Funti prus de 200 giassus de rafinatzioni de salnitro aunia trabagliadoris chi lompiant de su Cile, de sa Bolivia e de su Perù biviant in citadis aziendalis e s’agataiant a fraigai una cultura pampina totu paris. In cumunu. Custa cultura s’amostat massimamenti in sa limba chi est errica meda, ma finas po sa lota chi faint po sa giustissia sociali chi at tentu unu grandu cunsideriu in sa storia sociali de custus logus. Postus in s’atesu pampa, chi est unu de is desertus prus tostau de sa terra, migliaias de pampinus anti biviu e trabagliau in custu logu dificili meda po prus de 60 annus a partiri de su 1880, po fairi andai a innantis su giacimentu de salintro, chi est su prus mannu de su mundu.
Atru giassu cilenu a intrai in s’Unesco est cussu de sa citadi mineraria de Sewell posta a 2000 metrus in pissu de su mari cun su clima chi est cosa de macus. Sa citadi mineraria de Sewell est stetia fraigada in su 1905 de sa Braden Copper Company po is trabagliadoris de cussa chi est sa miniera de arramini prus manna de su mundu El Teniente. Est unn’esempiu mannu de is citadis aziendalis chi funt nascias in is logus prus stesiaus de su mundu.
Su de ses giassus imbucaus a suta de s’ala de s’Unesco po su Cile est invecias Capac Gnan e funti is sistemas de is caminus andinus chi eus giai contau in sa puntada intregada a s’Argentina. Custu giassu, imbucau in su 2014, est de cumpartziri cun atras natzionis che s’Argentina etotu, sa Bolivia, sa Colombia, S’Ecuador e su Perù
Dus annus a immoi invecias est imbucau s’urtimu giassu, difatis in su 2021 est stetiu arreconnotu comenti de prenda materiali culturali su Insediamento e mummificazioni artificiali de sa cultura cinciorro in sa regioni de Arica e Parinacota. Custu giassu bidi aintru tres testimonias: Faldeo Norte del Morro de Arica e Colon 10, ambeduas de sa citadi de Arica e Desembocadura de Camarones, prus atesu de centu chilometrus prus in basciu. Imparis testimoniant una cultura de cassadoris-arregortoris marinus chi biviant in sa costa ocidentali de su desertu de Atacama de su 5450 a su prus o mancu 890 a innantis de Cristu. In custu giassu si ddue agatat sa prus antiga testimoniantzia archeologica connota de mumificatzioni artificiali de corpus.
Beni, ce dda eus fata a cicai de fairi connosciri is giassus cilenus a suta s’ala de unesco. Ma, in prus de custus seti arreconnotus uficialmenti ce nd’adi atrus 17 chi anti fatu domanda. Funtiri, in ordini de data de iscritzioni, custus: Parcu natzionali de s’arcipelago Juan Fernandez, Parcus natzionalis Torres de su Paine e Bernardo O’Higgins Regioni de Magellano, Is Cresias de su Pranu artu, Via Baquedano, San Pedro de AtacamaAichina e Toronce, Santuariu artu de Cerro el Plomo, Palacio de la Moneda, Cresia e cunventu de Santu Franciscu, Domus dell’Hacienda San José de su Carmen de El Uiche, Viadotto de su Malleco, Depositu de is trenus de sa statzioni ferroviaria de Temuco, Is difesas de Valdivia, s’Arti orrocosa de sa Patagonia, is rutas Fell e Pall-Aike, Su giassu Archeologicu de Monte Birdi, su logu minerariu de Lota.
Màuru Mura
Dominigu, su binticincu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.bandiereitaliane.com/bandiera-cile/
