Su centrudrestra abarrat a su cumandu de sa Basilicata. In dd’una dì aunia sa genti est abarrada prus in domu, at votau su 49,8% de chini ddu podiat fairi, Vito Bardi abarrat comenti de presidenti, bincendu contras de Pieru Marrese, in su calis su centrumanca iat scumitiu, a pustis una filera de a innantis e a palas.
Su votu de sa Basilicata ndi tirat sa corona de partidu prus sceberau a is Steddaus chi a is Regionalis de su 2019 teniant su 20% e oi s’agatant cun prus pagu votus de sa metadi: s’8%.
Is numurus, a ddus ligiri, amostant ca Fradis de s’Italia est su primu partidu cun prus de su 16%, sighiu de Fortza Italia cun su 12% e sa Lega de Salvini cun s’8%. Su Partidu Democratigu a s’atra parti perdit unu puntu in percentuali cunfroma a is urtimas politigas e calat a su 15%.
“Torru gratzias de coru a totu sa genti chi at sceberau de donai fidi e agiudu a is politicas nostras – s’allirgat Giorgia Meloni –. Sa fidi bostra est su motori chi nosi fait andai a innantis dogna dì”. “Soddisfatzioni manna”, lompit de sa Lega, po “un’atra grandu vitoria de su centrudrestra” Ma, prus che a totu de Fortza Italia: “At bintu su centrudrestra totu paris. At bintu sa genti de sa Basilicata chi ant sceberau de si poderai totu cussu de bonu, e no est pagu, chi eus fatu in is urtimus cinc’annus”, is fueddus, postus in Twitter, de Antoni Tajani, chi est arrennesciu a cunvinciri is alleaus de sighiri cun Vito Bardi, chi in su 2019 est stetiu postu de Sirviu Berlusconi.
“Est una responsabilidadi manna de aberu chi intendu po totu issus, finas po is lucanus chi non mi ant votau o chi non funt anduas a ddu fairi. Ap’a sighiri a essiri su Presidenti de totus”, su messagiu de su guvernadori, chi a pustis airi bidu is “exit poll” cun dogi puntus de vantagiu in su mericeddu at bidu cresciri sa coalitzioni, chi in Basilicata fut ammanniada finas de “Azione” e “IV”.
Màuru Mura
Martis, su bintitres de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.basilicata24.it/2024/01/vito-bardi-ci-lascia-una-basilicata-ancora-una-volta-da-rifare-133920/
