De dus annus a cust’ala seus bivendu sempiri cun Covid in is pensamentus, ma sa vida est sempiri sigendu po totus cuasi ci sa cosa tochit purs a is atrus che a nosu etotu. Iat a bastai a si fairi una passillada in calechisiat orruga de is citadis e de is biddas e totu parit torrau comenti a innantis: genti a pereula e dognunu chi sighit a fairi cussu chi faiat.

De is matessi dus annus sa Regioni, dogna dì donati s numurus, chi calencuna borta faint a timiri de averas e atras, invecias nosi donat spera manna.

Eriseru atrus otu mortus de su Coronavirus in Sardigna e 3131 impestaus nous intru de 16.675 tamponis fatus. Arta sa percentuali intru de is unus e is atrus: 18,77 po centu: de timiri e de nosi fairi abarrai sempiri in atentzioni manna. Is patzientis chi s’agatant in is terapias intensivas calant de tres e imoi funt in dixianoi e cussus in is atrus aposentus calant de dus, imoi funt in 330. S’artziat de meda, de 518, su numuru, invecias, de chini abarrat incungiau in domu: 29118.

Is mortus funt duas feminas de noranta e noruntun’annus chi biviant in sa Citadi Metropolitana de Casteddu, una femina de norantadus annus de sa provincia de su Sud Sardigna, duas feminas de sessantotu e norantases annu e dus ominis de setantanoi annus e otantunu chi biviant in sa provincia de Aristanis e un omini de setantatrs de sa provincia de Tatatri.

Custa pesta mala, in custas dis , est picighendu massimamenti a is piciocus e piciocheddus chi andant de is cincu a is dixiot’annus e is dotoris de is pipius sighint a nai ca a fairi su vacinu est sa cosa de prus importu mannu. In Sardigna teneus percentuali prus aras de dogn’atr regioni italiana: si lompit a su 44% po is pipius chi erribant a is undixi annus e de su 41%, invecias, po chini non giupaat is dixiotu, ma galu non bastat e tocat a sighiri a ddu nai e a ddu torrai a nai.

In Murera gioia est obertu s’hub po totus e cenarba at essi sa matessi cosa in Isili.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.comune.oristano.it/it/il-comune-informa/notizie/notizia/Covid-Sardegna-in-giallo-da-lunedi-24-gennaio/