Est de interessu mannu sa partida de su Casteddu de dominigu chi benit in Frosinone, poita sa scuadra de Di Francesco est a innantis feti de unu puntu cunfroma a sa scuadra de Ranieri. Duncas chi si bincit foras de domu, e a innantis o in segus depit sussediri, is casteddaius podint giumpai is latzialis. Arregodus durcis po is tifosus de su Casteddu in sa partida de su gironi de andada. Difatis funt perdendu po 0-3 e in is urtimus minutus nd’iant bortulau sa partida bincendu po 4-3.

Su Casteddu est aprontendu custa partida in su Crai Sport Center de Assemini e in sa dì de eris s’est amostau finas Lapadula, ca in parti at trabagliau cun s’orrestu de sa truma e si podit pensai de ddu agatai sonumancu in panchina. Una nova bona custa, de averas, po Ranieri ca indenanti tenit is giogadoris contaus, difatis funt foras Oristanio cun Shomurodov, chi si funt strupiaus, Mancosu, chi est sighendu a trabagliai a una parti de is atrus e Luvumbo, chi s’agatat cun s’Angola a si giogai sa Cupa de s’Africa.

In su fratempus eriseru su giuigi sportivu at fatu connosciri is decisionis suas e su Casteddu no at a tenni po duas partidas in panchina su su numuru dus de Claudiu Ranieri, Paulu Benetti, scualificau po airi chistionau mali a s’arbitru in sa partida de dominigu passau cun su Bologna. Palladino de su Monza e Filipu Inzaghi de sa Salernitana funt is atrus dus allenadoris chi no ant a podiri setziri in panchina dominigu chi benit. Su giuigi sportivu at finas scualificau atrus trexi giogadoris: Duda de su Verona, Birindelli de su Monza, Cajuste e Kvaratskhelia de su Napoli, Calhanoglu de s’Inter, Cancellieri de s’Empoli, Coppola de su Verona, Cristante e Mancini de sa Roma, De Winter de su Genoa, Immobile e Zaccagni de sa Latzio e Posch de su Bologna.

In Frosinone s’arbitru at essi Federicu Dionisi de sa setzioni de L’Aquila, chi su Casteddu at giai atobiau ocannu in sa partida perdia in Roma cun sa Latzio, aunia iat stupau de su campu a Makoumbou.

 

 

 

Màuru Mura

 

 

Giobia, su dixiotu de gennargiu de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.fantacalcio.it/news/calcio-italia/13_10_2023/cagliari-lapadula-450660