Su Guvernu italianu est cuasi totu de acordiu po donai s’indicu po is butegas aunia si at a podiri intrai chena su Green pass de su primu de friargiu: butegas de cosa de papai, potecarias, oticus, butegas chi bendint pellet o linna po si caglientai, butegas po is animalis, benzinaius mercaus e logus aunia si bendint giornalis.

Abarrant foras de custa lista is librerias e s’est ancora chistionendu de is centrus cumercialis: si pensat ca chini non tenit sa carta birdi possat intrai ma feti po ddis donai sa possibilidadi de intrai in is butegas chi permitint s’intrada, duncas potecarias e atrus. In su stangu at a serbiri su Green pass.

Su sistema de is coloris, chi ancora no est mudau, comenti est imoi erriscat de fairi intrai in is zonas orrubias o arangiu regionis medas. Otu de is binti regionis italianas tenint is letus de sa terapia intensiva a su 20% (tra custs Latzio, Toscana e Piemonti) e sa media natzionali de is letus chi serbint a is impestaus in is atrus aposentus est de su 29%, cun sa Lombardia a su 34, sa Siclia a su 35, sa Calabria a su 41 e sa Valle d’Aosta a su 69. Sa Sardigna est acostiendusì sempiri de prus a su colori grogu.

In sa contu de is coloris su Guvernu at a fueddai cun is Regionis, galu non si scit candu, aici comenti, in is cidas chi benit (cun probabilidadi manna in su mesi de friargiu) at essi spostu a un’ala su sistema de is coloris. “In custu creu chi tocat a ci pensai beni, poita est giustu chi tochit a donai una seguresa a sa genti, bistu c apo su 90% funt vacinaus”, narat su  numuru dus de su ministeru de sa Saludi Andria  Costa.

“In is cidas chi ant a lompiri pensu chi s’at a mudai, est unu scioberu prus politicu che scientificu. At a agiudai a non fairi chistionai meda is no vax, sighit a nai Costa, po cantu pertocat sa scola deus oi po fairi abarrai in classi totu is piciocus vacinaus”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://sestosg.net/notizie/decreto-green-pass/