“Alissandra Todde non perdit ocasioni po dispretziai is istitutzionis autonomisticas. Ddu fait finas in sa televisioni candu chistionat, e ddue sliscinat, de is dipendentis sus cunfroma a chini est una istitutzioni”.
Custa sa torrada de fueddus de su guvernadori passau Christian Solinas a Alissandra Todde, chi in custas dis at chistionau de is nominas e deliberas de sa giunta de centrudrestra, a s’urtimu minutu, e finas de cussu chi at fatu in cinc’annus de guvernu.
“Su Presidenti de sa Regioni, chini chi siat, in is cumandus democraticus no est de certu unu dipendenti postu a sa gratzia de is fueddus sus o ancora peus de su stupamentu de una azienda sua e iat fairi meglius a tenni arresputu de su ruolu chi, forsis, at a tenni. Chi, custu non ddu depit scaresciri, est lompiu de pagus votus e duncas non tenit sa legitimatzioni manna chi invecias ant tentu atrus”, narat Solinas. Finas acingendu: “At a cumprendiri ca passat unu mari intru de sa diretzioni amministrativa e cussa de un’azienda”. E ancora sighit Solinas: “Po s’ora sa Todde at amostau feti superficialidadi, atacada de is fueddus sempiri agressivus”.
A pustis un’arrespusta finas a is fueddus (“Deu, de imprendidora, chi calencunu de s’azienda mia no iat valorizau custu dinari ce ddu ia stupau”) de sa Todde de s’atra dì, in sa puntada de Petrolio in Rai Tre, in pissu de is tres miliardus chi sa giunta de Solinas no at spendiu. Po custa chistioni Solinas at nau: “Po cantu mi pertocat deu non fui non fui candidau a nudda, mi possu feti allirgai de non essiri stetiu unu dipendenti cosa sua, poita iari biviu in precariedadi e cun sa cassa integratzioni. E a innantis de mi nci stupai, mi ndi fui andau a sa sola”. Fueddus tostaus cussus de Solinas, ma iat ess’ora de dd’acabbai cun custa cuntierra e torrai a partiri. Totus.
Màuru Mura
Giobia, su seti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.regione.sardegna.it/regione/istituzione/presidente
