Su presidenti de sa Russia, Vladimir Putin, in su tempus passau at amelessau un’atacu cun is missilis su Regnu Unidu intru de mesu de una telefonada cun cussu chi tandu cumandaiat in sa terra de is Windsor: Bosis Johnson. Est sussediu pagu tempus a innantis de s’invasioni russa in Ucraina de su 24 de friargiu de ocannu passau e ddu at scoviau su matessi Boris Johnson in d’una intervista a sa Bbc, sa Rai inglesa, po un documentariu intitolau: “Putin contras de s’Ocidenti”.

“Putin m’at nau ca iat essi bastau unu minutu”, at nau su presidenti beciu de is inglesus. Connoscendu is atacus russus a su Regnu Unidu de su tempus passau, s’urtimu in Salisbury in su 2018, cale chi siat amelessu de su capu de sa Russia depiat essiri pigau in su seriu. A innantis de is fueddus de Putin, Johson ddu iat avertiu, a su cumentzu de friargiu in d’una telefonada longa-longa ca sa guerra iat essi stetia una “disgratzia po totu su mundu”, ca s’ocidenti iat airi postu regulas contras de sa Russia e portau is sordaus de sa Nato in is lacanas de sa Russia etotu. Johnson at fintzas cicau de ndi tirai de sa conca a Putin sa pensada de s’invasioni, narendudeddi ca s’Ucraina, po su benidori prus acanta, no iat essi imbucada in sa Nato.

“A unu certu puntu – is fueddus de Boris Johnson cun sa Bbc – Putin mi at amelessau, nendumì: ‘Boris, non ti bogliu fairi mali perunu, ma, cun d’unu missili, iat a bastai feti unu minutu’. Creu chi de su tonu de sa bogi ca fut trancuillu meda po mimi fut feti brullendu cun sa gana mia de provai a ddu frimai”.

Noi dis a pustis de sa telefonada, fata s’undixi de friargiu, su ministru de sa Difesa de s’Inghilterra, Ben Wallace, iat atobiau in Mosca su matessi ministru de sa Difesa, Sergej Shoigu. Su documentariu scoviat ca Wallace fut torrau a partiri po Londra cun s’asseguratzioni ca sa Russia non imbucaiat in Ucraina, ma at nau ca s’unu e s’atru sciant giai ca fut una faula.

 

 

Màuru Mura

 

 

Lunis, su trinta de gennargiu de su 2023

 

 

Foto: https://www.open.online/2023/01/30/regno-unito-boris-johnson-minaccia-putin-bombardamento/