S’indagu in pissu de Christian Solinas lompit, chena de farta, in sa campagna eletorali de sa Sardigna. Eriseru sa Guardia de Finanza at secuestrau dinari po 350mila eurus a su presidenti de sa Regioni e a atrus ses indagaus po corrutzioni.
Duas is partis de s’indagu. In su de unu, po cussu chi narat sa Procura, Solinas s’est interessau de fairi otenni fornituras publicus a s’imprendidori Robertu Zedda chi iat comporau una domu de su guvernadori in Cabuterra a unu pretziu artu meda, est a nai 303 mila euros in prus de su valori chi po sa procura est de 72 mila euros. Cun cussu dinari Solinas iat airi comporau una Land Rover e donau dinari po 246 mila euros po sa compora de una villa in su cuartieri de su Soli in Casteddu.
Sa parti de duas est, invecias, sa nomina de Robertu Raimondi a sa ghia de s’Enpi, in cambiu, po sa procura, de is impromintzias de fairi otenni a Solinas docentzias in sa facoltadi telematica e de una laurea “honoris causa” in Albania.
In prus de su Guvernadori funt suta indagu finas s’imprendidori Robertu Zedda e su consiglieri regionali de su Partidu Sardu de Atzioni Nanni Lancioni in sa parti de unu, s’agiudanti de Solinas, Christian Stevelli, su retori de s’universidadi de Tirana Arben Gjata e su dirigenti de sa E-Campus Alfonsu Lovito in sa parti de dus.
Su secuestru cumandau de su giuigi Luca Melis a pustis airi ascurtau su Publicu Ministeru Giuannigiagu Pilia est po benis de 303 mila euros po sa presunta corrutzioni in pissu de sa domu de Cabuterra e de atrus, prus o mancu, 42 mila eurus acapiaus a sa chistioni de s’Enpi.
Comenti de sempiri, in custas ocasionis, Solinas e sa Lega fueddant de giustitzia chi lompit a “cuatru dis de sa presentatzioni de is listas regionalis e in su mentris chi si pigat sa decisioni de su candidau a presidenti de su centrudrestra”.
“Paperis chi iant depiri essiri segretus – sighit a nai Solinas – funt invecias in possedimentu de totu is giornalis. In dd’unu Stadu de diritu custas cosas non si depint agatai”. Po difendiri Solinas lompint finas is fueddus de su numuru dus de sa Lega, Andria Crippa: “Si votat su 25 de friargiu e bessint a foras custas curpas po Solinas. Solidariedadi manna a su Presidenti”.
Abarrat citiu s’orrestu de su partidu chi fait sciri, a dogna manera, ca s’indagu non at a mudai is paperis in sa mesa, in atrus fueddus chi Solinas at a fairi unu passu a palas no at essi po curpa de s’indagu.
Màuru Mura
Giobia, su dixiotu de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/01/17/sardegna-unaltra-grana-per-il-governatore-solinas-sequestro-di-beni-e-immobili-da-350mila-euro-nellindagine-per-corruzione/7413894/
