Salvini andat bia s’agiudu a Truzzu. Ancora no est uficiali, ma su capu de sa Lega intendiu de sa trasmissioni Rai Agorà at fatu cumprendiri ca s’acordiu in pissu de su sindigu de Casteddu est fatu: “Eriseru, a pustis su Consigliu de is ministrus, eus chistionau cun Giorgia Meloni de eletzionis regionalis, cun su centrudrestra cicaus de andai a innantis paris po binciri. Eus a agatai s’acordiu, ca in is logus si dde agatant personis meda chi balint. Po mimi est sempiri giustu a candidai cussu chi bessit de annus de guvernu, ma po s’unidadi de sa coalitzioni s’acordiu ddu eus agatai”.

No est ancora uficiali su giai a su sindigu de Casteddu, ma mancat pagu. Difatis giai de calencuna dì, a parti is fueddus de circostantzia, si cumprendiat ca sa Lega fut cunvinta de lassai a perdiri a Christiam Solinas. Nuis invecias in pissu de su sceberu de su Psd’Az, chi cenarba s’atobiat in Aristanis po pigai una decisioni, finas poita a intru de su merì de su bintidus de gennargiu tocat a presentai is listas. E nudda est escludiu de is sardistas, de sa cursa a sa sola finas a s’agiudu a Renatu Soru.

Finas Mauritziu Lupi, capu de “Noi Moderati” is calis candidaus s’ant agatai in listas regionalis de su Centru Mannu, est cunvintu: “Nos eus a presentai, comenti de sempiri, unius. Sa Lega at a fairi unu passu a palas po Christian Solinas e at a sustenni su sindigu de Casteddu Pàulu Truzzu”, narat a s’arradiu Rtl 102.5.

Lupi fait s’esempiu de sa Sicilia, prus de una bia fatu de cussus de Fradis de s’Italia: “Po mori de problemas in su territoriu, sa Lega e Fortza Italia ant pediu de fairi unu passu a palas a su guvernadori de is Fradis de s’Italia, Musumeci, po cicai unu nomini agradessiu de totus”. Lupi at finas chistionau de is atras regionis, s’Abruzzo, sa Basilicata e su Piemonti, chi ant a votai: “Nosu andaus a innantis cun Marcu Marsilio e Arbertu Cirio in Abruzzo e in Piemonti e in sa Basilicata creu chi Vito Bardi apat fatu beni, ma nosi eus a chistionai”.

 

 

Màuru Mura

 

 

Mercuris, su dixiaseti de gennargiu de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ansa.it/sito/notizie/politica/2024/01/17/salvini-sulla-legge-sul-fine-vita-in-veneto-bene-il-no.luca-zaia_82f5505d-0bc0-4471-8298-694d7ea0661f.html