Salvini s’atra dì in Sassari, aunia est lompiu po sa campagna eletorali po is regionalis sardas, iat nau ca po: “sa seguresa in su centru de sa citadi serbit s’umperu de s’esercitu”. Non perdit mai ocasioni de impromintzias chena conca, ma custa bia is sindacaus de sa politzia de su Stadu at fatu intendiri sa sua, nendu inderetura ca funt contras custa pensada e ca sa Brigata Sassari tocat a dda umperai po atras cosas.
“S’umperu de s’Esercitu – scrint in dd’unu paperi is segreterias provincialis de su Siulp, Siap e Silp Cgil – comenti de amelessu in operatzionis de spantu, arrespetu a cussus chi faint beni dogna dì, non podit essiri umperau a cumbatiri sa seguresa, ca s’agatat giai sa politzia a ddu fairi”. Arregodant finas ca is sordaus non podint fairi a sa sola in is operatzionis de politzia giuditziaria, ma depint tenni a su costau sempiri is fortzas de politzia e totu.
“Cumbidaus sa politiga e is politigus, de calechisiat parti o colori – sighint a scriri in su paperi, totu paris – a agatai atras maneras cunretas e realis po cicai de ammanniai su numuru de is politziotus in citadi e in provincia, e a non umperai fueddus chi serbint feti a improsai sa genti ma chi non serbint po nudda a agatai sa solutzioni po su cumpudu de su territoriu”. Custu po cicai de cumbatiri calencunu problema comenti sa mafia nigeriana in sa Tatari becia o su disacatu de is bardanas a is machinas chi portant dinari de una parti a s’atra, comenti est sussediu in is orus de Siligo sa cida passada.
Is associus de categoria si narant, infinis, prontas a un’atobiu cun is politigus e arregodant finas comenti su cara a cara cun Micheli Pais, presidenti de su Consigliu regionali, chi boliat sa matessi pensada de Mateu Salvini, “non s’est mai fatu e nosu fustis a dispositzioni manna”.
Forsis invecias de is fueddus in campagna eletorali serbint is fatus.
Màuru Mura
Dominigu, s’undigi de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lanuovacalabria.it/i-sindacati-di-polizia-siulp-ed-fsp-auditi-dal-consiglio-provinciale-di-catanzaro-votato-atto-dindirizzo-per-listituzione-del-reparto-mobile
