Est mortu in sa domu sua in su Connecticut, Henry Kissinger, chi est stetiu su segretariu de Stadu de is Stadus Unidus po annus meda. Iat lompiu is cent’annus in su maju passau. Margiani mannu de sa politiga e statista abistu, at trabagliau finas a s’urtimu. Chini, de issu, ndi chistionat comenti unu geniu spantosu e, invecias, chini ddu bit comenti unu geniu de sa malesa. At essi po sempiri aici, poita funt duas pensadas chi non si podint atobiai. Ebreu, fuiu de s’Europa a innantis de sa Guerra Mondiali de duas, candu iat lompiu is cuindixi annus de idadi, Kissinger in sa vida sua at tentu feti un’obietivu: fairi de is Stadus Unidus sa prus manna potentzia internatzionali. E po custu bisu non s’est frimau in calechisiat problema. Bastat a arremonai is bombas e s’invasioni in Cambogia, s’agiudu a Augustu Pinochet po nci stupai a Sarbadori Allende in Cile.

Est intervenniu finas in sa relata de sa guerra intru de Ucraina e Russia, ma non in cussa benia a pigliu in s’urtimu mesi intru de sa Palestina cun Israele. Est a nai puru ca issu est stetiu unu de is protagonistas de sa gherra de su Kippur, chi iat bidu, in su 1973 Israele bincidori. Po fairi cumprendiri sa potentzia de cust’omini finas a is urtimas oras de vida basta a pensai ca in is mesis passaus at atobiau, in Washington, s’ambasciadora italiana Mariangela Zappa e sa presidenti de su Consigliu Giorgia Meloni. E, in su mesi de orgiolas de ocannu, s’agataiat in Pechino aunia at atobiau su presidenti XI Jinping e atrus dirigentis de su Partidu Comunista Cinesu.

In Italia est stetiu amigu mannu de Giuanni Agnelli e a sa matessi Italia at sempiri donau una mirada cun atentzioni manna. Cumprendiat ca fut una natzioni de importu mannu, massimamenti po is Stadus a intru de su Patu Atlanticu, finas chi si poderaiat su partidu Comunista prus mannu e de fundamentu de totu s’Ocidenti.

 

 

Màuru Mura

 

 

Cenarba, su primu de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://it.images.search.yahoo.com/search/images