Parteus de una seguresa: candu su mundu perdit un’Omini comenti de Gino Strada abarrat prus poburu. Tocat a ddu prangiri su dotori milanesu, nasciu in Sesto San Giovanni in su 1948, chi in su 1994 at tentu sa pensada de ndi pesai, de nudda, su sotziu Emergency. Gino boliat chi in dogna logu aunia erribaiat sa guerra ddue fessit calencunu dotori e genti capassa chi podiat agiudai is prus poburus e is prus mali postus. Ddu connosciant apetotu, de su Afghnistan a s’Iraq, de s’Uganda a su Sudan e a sa Sierra Leone. Est erribau po cicai de agiudai sa genti e po sarvai vidas, Gino, ce dd’at fata cuasi sempiri.
In is urtimus annus s’est fueddau de calencunu impignu in politiga de Strada, ma de omini balenti e sabiu est bofiu sempiri abarrai a foras, ma nendu a bogi arta cussu chi ddi passaiat in conca candu beniat cumbidau a nai sa sua po chistionai de guerras e diritus.
“Amigus, su babbu miu non c’est prus. Deu bosi imbrassu, ma non possu arrespundiri a totu is messagius chi soi ligendu, bosi torru gratzias de coru, ma soi cun sa ResQ – People saving people aunia eus sarvau genti. Est cussu chi m’ant imparau babbu cun mama. Imbrassus a sa strinta a totus”, at nau sa figlia de Strada, Sessilia.
Unu de is primus a prangiri Gino Strada est stetiu Perdu Grasso, senadori de Leu e presienti beciu de su Senau: “In su mentris chi is talebanus faint strada in Afghanistan erribat sa nova trista de sa morti de Gino Strada. Omini mannu chi at fatu onori a totu s’Italia in su mundu. Un’imbrassu a Sessilia e a totu cussus chi ant trabagliu e trabagliant cun Emergency”, at scritu in is social.
“Strada at passau sa vida sua sempiri de sa parti de is prus debilis in is zonas prus dificilis de su mundu. A sa figlia Sessilia e a totu is collegas de Gino Strada bogliu chi erribint is passientzias de su Guvernu italianu”, at nau, invecias, Màriu Draghi.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://tg24.sky.it/cronaca/2021/08/13/gino-strada-morto
