Casteddu est diventada domu sua aici unu pagu cheena ddu sciri. In s’istiu de su 2015, cun sa scuadra prus famada e de importu mannu de s’Isula calada in Serie B e totu s’ambienti postu in dolu, Fabiu Pisacane lompiat de s’Avellino bofiu, massimamenti, de Massimo Rastelli s’allenadori chi ia tentu in Campania. In sa cadeteria abarrat feti un’annu ca su Casteddu teniat una scuadra manna e c’iat postu pagu a binciri su campionau. Su 18 de cabidanni de su 2016, a s’idadi de trint’annus sonaus, in sa partida binta cun s’Atalanta po 3-0 Pisacane giogat po sa prima borta in Serie A. Po Pisacane cussa de su 2016-17 ftu stetia un’annada de averas manna, famada e prena de maja: su giornali ingresu The Guardian, difatis, ddu iat premiau comenti de giogadori de s’annu. Mancaiat calencua cosa apo essiri ancora prus allirgu: unu gol in Serie A. Fut lompiu cussu puru in s’urtima partida de campionau giogada in su Sant’Elia de Casteddu. E su gol non fut erribau cun d’una scuadrigedda calechisiat, ma contras de su Milan donendu sa vitoria a sa scuadra allenada tandu de Rastelli. Pisacane abarrat in Casteddu fintzas a su cumentzu de su 2020, po cussu chi si narat poita no andaiat de acordiu cun s’allenadori de tandu Eusebiu Di Francesco, chi in Casteddu no at lassau arregodus durcis. E aici, de fatu de 145 partidas giogadas e cuatru gol fatus, Fabieddu iat pigau s’andala de Lecce, a innantis de s’arretirai comenti de giogadori.

Ma su contu de Fabio Pisacane cun sa citadi de Casteddu a tentu unu cumentzu nou de pagu tempus a immoi: est intrau in cussus chi agiudant s’allenadori nou Fabiu Liverani. Torrat in Casteddu de fatu de una calada in serie B chi at lassau feli mannu, comenti candu fut lompiu sa prima borta in Sardigna.

Sa spera est chi sa storia si torrat a arrepitiri e chi s’annu de inferru durit feti un’annu e Pisacane tengiat sa matessi bonasorti.

 

 

15 de triulas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.corrieredellosport.it/news/calcio/serie-a/cagliari/2021/01/19-78330425/pisacane_saluta_il_cagliari_saro_sempre_un_tuo_tifoso_