“Su presidenti Biden at nau ca is mortus, intru de sa genti comuna funt medas. Chi funt medas tandu, forsis, depit donai prus armas pagas a Israele, mi parit sa pensa giusta e su meglius chi possat sussediri”.

Custus is fueddus de Joseph Borrell, su rapresentanti mannu de sa Unioni Europea, politigu spagnolu de su PSOE chi dde su 2019 trabagliat in Bruxelles, in dd’unu atobiu cun is giornalistas. Atobiu chi at fatu paris a su comissariu de s’agentzia Unrwa de s’Onu, su svitzeru Philippe Lazzarini.

“Totu lompint in Tel Aviv e pedint su matessi ‘po prageri, ci funt tropus mortus, bocei de mancu sa genti cumuna’, ma Benjamin Netanyahu no intendit a cuss’origa. Forsis sa chistioni est de acabbai de pediri ‘po prageri’ e fairi calencuna cosa po acabbai custu disacatu”, at aciuntu su spagnolu Borrell.

Po cantu pertocat is urtimas pensadas in pissu de su sfollamentu, Borrel at a pustis pregontau, in manera de omini abistu de ciorbeddu: “E aunia ddus mandaus? Nosi abarrat feti sa Luna. Ddus mandaus inigui?”.

S’atobiu cun is giornalistas est stetiu fatu insegus a sa chistioni de, si pensat, airi pigau parti, de calencuna personi de s’Agentzia Onu, po s’agiudu a is palestinesus a is atacus de Hamas contras de su Stadu Ebraicu de su seti de mesi de talamini passau, chi ant fatu partiri is atacus de Tel Aviv, sa cpaitali de Israele, contras de sa genti chi bivit in sa Striscia de Gaza.

Po totu custu Borrel at pigau su fueddu e at nau: “Incurpant totu custu a s’Unrwa e funt feti fueddus poita is curpas dapoi tocat a ddas provai. Su indagu nostu est giai partiu e seus fueddendu de sa manera de fairi de trexi personis in pissu de trinta mila trabagliadoris de s’Unrwa. Non si arrioleis meda ca chi curpas ci funt eus pigai decisionis fortis, ma non at essi una cundenna po totu sa genti chi trabagliat. A frimai su trabagliu nostu, comenti disigliat Israele, iat a bolli nai unu disacatu umanitariu in Gaza e in is Stadus de s’Orienti de mesu e custu non si ddu podeus permitiri poita tocat a pensa finas a sa seguresa europea. Cincu milionis de ominis dipendint de s’agentzia nosta”.

 

 

 

Màuru Mura

 

 

Martis, su tregi de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://lavialibera.it/it-schede-1540-guerra_israele_palestina_hamas_gaza_palestinese_africa