“Torru gratzias a dogna capellanu ucrainu chi est in s’esercitu, in is Fortzas de Difesa. S’agatant a su costau de is sordaus, chi difendint sa vida e s’umanidadi, cun is preghieras, cun su fueddai e agiudant finas cun is atzionis. Custu est cussu chi est sa Cresia: abarrat paris a sa genti, non de calencuna parti postus a sa stesiada po duamila e cincuxentus chilometrus. Est a nai ca in custa guerra s’agatat una parti chi bolit sighiri a biviri e un’atra chi ti bolit distrugiri”.
Volodymyr Zelensky arrespundit chena girus de fueddus a cussu chi at nau Paba Franciscu custu mengianu. Su Paba at feti nau de trabagliai po sa pagi, ma in Kiev non ce dd’ant calada e inderetura si funt amostaus: “Is bocidoris e is torturadoris russus non si movint bia s’Europa feti poita funt tratennius de is ucrainus cun is arbas e cun sa bandela asula e groga”, at aciuntu su presidenti ucrainu chi torrat in segus is fueddus de Franciscu de tenni “su coragiu de sa bandela arva”, po chistionai cun Mosca. Fueddus chi furint giai postus a un’ala de su ministru de is Esteri de Kiev, Dmytro Kuleba: “Sa bandela ucraina est cussa po sa cali biveus, moreus e binceus. Non dd’eus a pesai perun’atra bandela”.
“Su machimini de is russus depit perdiri custa guerra e eus a fairi de totu po custu”, iat nau in is dis a innantis Zelensky, ca no at chistionau craramenti de su Paga, cun su cali su stesiamentu est mannu de tempus meda.
Kuleba, a dogna manera at torrau gratzias a Paba Franciscu po is preghieras suas po sa pagi. “Ma, est finas a nai, invecias de chistionai de nos’arrendiri, bengiat in Ucraina”, narat sempiri su ministru chi aici cumbidat un’atra borta su Paba.
In su mentris Mosca s’allirgat: “Dogna espertu, dogna politigu, dogna diplomaticu oi cumprendit ca sa situatzioni in Ucraina est in dd’una andala tzurpa”, at nau su portabogi de su ministru de is Esterus Maria Zakharova, po sa cali is fueddus de Franciscu funt po s’Ocidenti e non po Kiev.
Màuru Mura
Dominigu, su dexi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/2024/03/11/ucraina-zelensky-lavanzata-russa-e-stata-fermata_38ed6969-3d28-43ae-8c23-2c189aa7f05f.html
