Oi, cenarba primu de Santu Aine, a is noi oras mancu unu cuartu in sa Unipol Domus (mamma mia ta orrori legiu custu nomini!) su Casteddu si dda giogat cun su Venetzia de Zanetti. Po is sardus contat feti una cosa: binciri e fairi tres puntus po cumentzai a castiai sa classifica cun fidi e spera, a pustis feti dus puntus in is primas ses partidas de custu campionau.

Su Casteddu, paris a sa Salernitana, est sa sola scuadra chi ancora no at bintu mancu una partida, finas chi at giogau tres partidas in domu contras scuadras chi podiant essiri bintas. Cun cuindixi gol pigaus est, sempiri paris a Salernitana, Spetzia e Genoa, finas sa scuadra chi tenit sa difes peus.

Wlater Mazzarri, chi de tres partidas setzit in sa panchina, non castiat galu sa classifica e pensat feti a su trabagliu fatu po erribai a custa partida: “Finas custa – narat – est stetia una cida curtza, ma assumancu eus tentu duas dis in prus po trabagliai. Eus provau e torrau a provai cosas de amostai in campu e depu nai ca is piciocus funt scidus e cumprendint a sa lestra cussu chi bogliu”.

Eriseru in Asseminello ddue fut finas su presidenti Giulini, chi est bofiu abarrai a su costau de sa scuadra.

“Chini at a calai in campu custu merì? Tengiu ancora calencuna duda – sighit s’allenadori toscanu – ma possu biri chini serbit de prus gratzias a su trabagliu chi feus intru de mesu cida e non feti castiendu is partidas. Custas duas dis in prus funt serbias po torrai a carrigai su corpus e sa menti”.

“Candu benia innoi po mi dda giogai cun su Casteddu – aciungit – m’arregodu ca fut dificili meda a binciri, imoi est erribada s’ora de torrai a cussus tempus. Galu est ancora a coitu po castiai sa classifica, a innantis tocat a castiai comenti is piciocus trabagliant. Issus funt is primus a sunfriri de is risurtaus chi no erribant, ma serbit a tenni in conca e in su coru sa fidi. Su Venetzia est una scuadra scida, giogat cun allirghia, comenti totu cussas chi funt bessias de sa Serie B e non tenit nudda de perdiri, comenti s’Empoli chi nos at bintu sa cida passada. Currit meda e giogat sempiri in sa matessi manera, po custu possu nai ca funt perigulosus. Nosu depeus feti cussu chi eus fatu a intru de cida. Eis a biri ca ce dda eus a fairi”.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://calciodangolo.com/2021/09/pronostico-cagliari-venezia-7-giornata/