“Ce dd’eus fata! Su mudamentu cumentzat immoi. Su partidu laburista est mudau ca est prontu a guvernai e agiudai su Stadu nostu, prontu a torrai a portai sa Gran Bretagna a su servitziu de is trabbagliadoris. Est cosa de importu mannu e ateretanti responsabilidadi. Depeus torrai a portai sa politiga a su servitziu de totus. Custa est sa prova manna de sa politiga in custu tempus: sa lota po sa fiducia est sa bataglia chi cumpartzit su tempus nostu. A innantis sa Natzioni, de segus su partidu est una ghia de primori”. Aici chistionat a su Guardian su leader laburista Keir Starmer, fueddendu de comenti est andada sa torrada eletorali in Gran Bretagna. Torrada eletorali chi non lassat peruna duda: cun sa ligidura de is votus ancora de cumpletai e cun 91 postus chi cicant meris, po cussu chi narant is urtimas proietzionis de sa BBc, s’atra parti s’agatat cun feti 92 deputaus, su numuru prus basciu de totu su contu politigu insoru. Is laburistas, invecias, torrant a su poderi a pustis 14 annus e cun dd’una magiorantzia chi non lassat dudas. Difatis ant giai giumpau is 378 deputaus chi abbingiat po tenni sa magiorantzia in sa Camera de is Comuni.
De is numurus finas s’arresultau de s’eletzioni in sa matessi Camera, a pustis chi c’iat provau po seti bias, de Nigel Farage, su leader de sa destra populista de Reform UK chi at bintu in su collegiu de Clacton-on-Sea, pigau a su Partidu Conservadori de Rishi Sunak. Su matessi Farage chistionendu de is numurus de su partidu at torrau a sfidai is Torys e avertiu finas is laburistas de Keir Starmer, su bincidori mannu de custa torrada eletorali: “Non seus allirgus po nudda – at nau Farage- de sa vitoria de Starmer. Eis a biri ca su guvernu coidendu at a tenni problemas mannus e su partidu nostu dd’at essi in pissu”.
De candidau indipendenti torrat in sa Camera, a pustis chi de is Laburistas ci ddu iant stupau, finas Jeremy Corbyn, bandela de sa manca, chi at bintu in su collegiu de Islington North in Londra.
Màuru Mura
Giobia, su cuatru de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/2024/07/04/keir-starmer-un-tipo-normale-a-downing-street_fa4e6de8-22b9-4644-bdc9-2e9e58e108ee.html
