Pariat una paristoria. Tanieli Conti fut lompiu in Casteddu candu teniat bint’annus, gioghendu inderetura in Serie A, finas chi s’annada fut acabada mali cun d’una retrocessioni. De tandu, finas tenendu s’ocasioni, est sempiri abarrau acapiau a is coloris sardus gioghenduru seixi campionaus, intru de Serie A e Serie B, diventenduru su capitanu de sa scuadra e una de is urtimas bandelas. Po 439 bortas iat postu sa maglia in pissu e fendu finas corantotu gol. A su cumentzu is cosas no est chis siant andadas beni meda , ma de fatu s’est apicigau a is coloris orrubius-asulus in sa peddi.
A pustis airi smitiu de giogai, inderetura est intrau in s dirigenza de sa scuadra de sa capitali sarda, sighendu a esssiri una bandela, bofia beni, de totu is tifosus. Immoi, a pustis binticuatr’annus e a pustis chi sa scuadra c’est calada in Serie B, s’est lassau po mori de problemas personalis, sonumancu aici narat sa nota de sa dirigentzia casteddaia chi narat: “Sa squadra de su Casteddu fait sciri chi Tanieli Conti in sa dì de eriseru at decidiu de non trabagliai prus cun su Casteddu comenti de Coordinadori tecnicu de sa Primavera. De su 2016 , insegus a airi acabbau de essiri giogadori po seixi annus de sighiu, Conti fut intrau in s’Area Tecnica de sa Sociedadi. Po su Casteddu s’umanidadi, imparis a sa grandu esperientzia e a su’atacamentu mannnu a sa is coloris nostrus funt stetius una prenda chi non tenit paragoni cun cuasi atru perunu giogadori. In custus annus, aunia at sighiu in giovunus at fatu unu trabagliu spantosu, amostendu de essiri grandu connoscidori de fubalu e agatendu giogadoris chi funt serbius finas a sa scuadra de is mannus.
Su Casteddu non podit che pigai in contu sa decisioni de Tanieli, finas cun amargura manna, chi non s’aspetatiat, ma non ce dd’at fata a di fairi mudai su pensamentu. Totu su Club ddi torrat gratzias po cussu chi at amostau in totu custus annus e s’augurat po su benidori de podiri torrai a trabagliai paris.
13 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Daniele_Conti#/media/File:DanieleConti_2013.jpg
