In Brasile cumentzat sa cassa de cussus chi ant responsabilidadis mannas po su carrabusu de su noi de gennargiu in Praca dos Tres Poderes. E a pustis airi cumandau de acapiai unu ministru beciu, genti meda est stetia frimada de sa politzia. Su presidenti beciu Jair Bolsonaro chi, est bessiu de su spidali in Florida aunia fut ricoverau, decrarat ca at a torrai in Brasile aintru s’acabu de custu mesi. In su fratempus su ministru de sa Giustissia, Ricardu Cappelli, at fatu foras totu is capus de is fortzas de sa seguresa de Brasilia, incurpaus de no airi fatu su doveri insoru.
Intru de custus agataus su cumandanti de is “Truppe d’assalto” su magiori Gustavo Cunha, in segus su colonellu Eduardo Naime, su comissariu de politzia Fernando Souza Oliveira e Marilla Ferreira de Alencar, numuru dus de s’Intelligence brasiliana. Cappelli, postu de su presidenri Luiz Inacio Lula da Silva, at fatu foras finas su colnellu Fabio Augusto Vieira, chi fut cumandanti de sa politzia militari. Cust’urtimu s’agatat immoi in presoni.
In su mengianu de mercuris, su giuigi de sa Corti, Alexandre de Moraes, at cumandau de acapiai su ministru de sa Giustissia de su guvernu de Bolsonaro, Anderson Torres, chi iat pigau su cumandu de su ministeru de sa Pubrica seguresa de sa provincia federali de Brasilia su dus de gennargiu, e in segus est partiu in is Stadus Unidus cincu dis a pustis.
Moraes, bistas is novas chi fueddant de manifestas noas, at proibbiu s’ocupatzioni de stradas e autostradas e totu is manifestadas aprontadas indenanti de is edificius pubricus. Chini no obidit erriscat de pagai una multa de bintimila reais chi bessit finas a centumila po chini trabagliat in is aministratzionis.
Sa politzia brasiliana at acapiau finas Ana Priscila Azevedo, incurpada de airi aprontau su carrabusu a sa democratzia de Brasilia e chi s’agatat in prus de unu videu pubricaus in is social. Sa femina dd’ant acapiada in Luziania e in segus portada in Brasilia. In is dis a innantis de su carrabusu, Azevedo, in is social, iat insugliau de carrabusai is istitutzionis chistionendu de “genti meda lompia de totu su Brasile po fairi orruiri Babilonia”.
De parti sua, su presidenti Lula narat de bolliri “pensai a calencuna cosa de mancu de unu ‘golpe’, ca totu est stetiu fatu de una truma de macus. Funt una parti pitica chi sighit a creiri a is faulas e chi non bolit creiri ca is eletzionis funt stetias regolaris. Deu non bolia s’interventu de sa politzia federali, ma custa genti non bolit fueddai cun nosu”.
Màuru Mura
Giobia, su doxi de gennargiu de su 2023
Foto: https://ilmanifesto.it/con-lula-e-amlo-il-subcontinente-puo-avere-una-voce-sola
