Totu citius in is social is giogadoris de su Casteddu de fatu sa partida contras de su Venetzia, acabada 0-0, chi at cundennau sa scuadra sarda a si giogai su campionau de ocannu chi benit de Serie B.
Calencunu, però, at decidiu de chistionai su matessi, e s’urtimu a ddu fairi est stetiu Luca Ceppitelli cun d’unu post in Instragram: “Su marrigosu est galu meda a pustis finas una cida de su chi est sussediu, dificili meda acetai e si fairi intrai in conca cussu chi depiat essiri s’obietivu nostu”, scrit su difensori de su Casteddu. Aciungendu puru: Dificili poita eus cicau finas a s’urtimu de nosi dda gherrai, umperendu totu cussu chi teniaus a intru, in conca e in su corpus.. Su campionau est cumentzau mali, ma a unu certu puntu pariat ca is cosas funt andendu beni, massimamentei candu eus bintu in Bergamo e in Torinu, ma a s’acabbu non ce dda eus fata a deressai cussu chi faiat a sa portda nosta. Eus faddiu bortas medas, ma immoi est erribau su tempus de nosi castiai a innantis de nos indi torrai a pesai comenti eus fatu paricias atras bortas.
De seguru non sciu cali at essi su benidori miu, ma de una cosa soi seguru: su Casteddu at a torrai in Serie A, poita est cussu su campionau chi depit giogai. Is tifosus ant essi allirgus poita minescint, po sa passioni chi ddue ponint, vitorias medas”.
E acabat cun: “Ad maiora e sempiri fortza Casteddu”.
Comenti eus nau funt pagus is giogadoris chi ant chistionau, a innantis de Ceppitelli ddu iat fatu Andria Carboni: “In su 2015 ndi boddia is bocias chi bessian a foras de su campu – iat scritu su difensori tonaresu – bia is giogadoris de sa scuadra prangiri po ce dd’airi acabada in Serie B e non cumprendia beni eita fut sussediu. Dominigu passau, candu sa partida est acabbada, invecias, apu cumprendiu totu. Peus de aici non ci podiaus calai in Serie B…”.
30 de maju de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://sport.virgilio.it/calcio/giocatori/luca_ceppitelli/
