Sighit a fairi chistionai e arriolai sa morti in presoni de Alexei Navalny, s’oposidori prus mannu de su presidenti de sa Russia Vladimir Putin, impresonau in dd’una atesu colonia penali in s’Articu e mortu, de un’ora a s’atra, in is dis passadas.
Is collaboradoris de Navalny, chi iat lompiu is corantaseti annus de idadi, ant fatu sciri ca is autoridadis russas no ant donau su permissu a sa familia de imbucai a biri su corpus po sa dì de tres de sighiu.
“Sa mama de Alexei e is abogaus sus funt lompius aunia s’agatat su corpus custu mengianu a coidu. Ma, cosa de macus, non ddis dd’ant donau su permissu de imbucai. Unu de is abogaus est stetiu spintu a fortza, foras. Candu totus ant pregontau chi su corpus de Alexei Navalny fut a intru de cussus aposentus, nemus de cussus chi si ddue agataiant at arrespustu”, at scritu in is social su portabogi de Navalny, Kira Yarmysh.
E sa pobidda de Alexey Navalny, Yulia, at fatu girai, sempiri in is social, unu videu, aunia in manera crara at umperau custus fueddus: “Putin at bociu a pobiddu miu”, scoviendu, a parrer su, ca su pobiddu podit essiri stetiu avelenau cun su Novichok e ca su corpus no ddu donant inderetura po fairi sparessiri is arrastas de su velenu e atacai totu sa beridadi.
Unu contu custu aunia si ddue agatant umbras medas chi funt fendu arriolai totu is istitutzionis ocidentalis. “Depeus donai agiudu e fairi cumprendiri a chini est contras de Putin in Russia ca seus cun issus. Ap’a proporri atras santzionis de s’Unioni Europea po su regimi russu in pissu de is diritus de is ominis. In nomini, mascamente, de Alexei Navalny. Eus a fairi in manera chi su nomini de s’omini at essi arregodau po sempiri”, at nau su rapresentanti mannu de sa UE, Josep Borrel.
Misteriu mannu, sa morti de Navalny, ma chi si ligit intru is contus ddu est sa beridadi.
Màuru Mura
Martis, su binti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://people.com/alexei-navalny-russian-opposition-leader-sudden-death-prison-8584208
