“Su ministru de is Internus narat de no essiri arriolau e ddu narat in su mentris chi trumas de dellecuentis faint cussu chi bolint in su territoriu, forsis bastat a pensai a cussu chi est sussediu in Tatari, chi amostant cosas chi feti in su Far West podiant sussediri, o comenti cussu chi est sussediu in Napolli sabudu passau candu militantis de Sinistra Italiana funt stetius postus in disacatu de is fascistas. Iat bastai feti custu po ci stupai custu guvernu e ddus fairi torrai a domu insoru ca non funt capassus”.
Aici Nigola Fratoianni, capu de Alleanza Verdi Sinistra, chi chistionat de su numuru unu de su Viminali, Mateu Piantedosi, a pustis sa bardana in sa Mondiapol de Caniga, in Tatari, aunia is bandius ant atacau cun armas de guerra fendu a timiri meda, e a pustis sa chistioni de Fanpage, aunia s’inchiesta de unu giornalista at amostau sa presentzia, intru de is trumas de is giovunus de su partidu de Fratelli d’Italia de prus de unu chi ponint is fascistas in is pumus artus e si bit finas calencunu deputau de su matessi partidu chi saludat cun su sa manu ereta comenti si faiat in is bint’annus de ditadura de Mussolini.
“Intendendu is fueddus de su Ministru de sa peus destra chi chi s’agatat in su Viminali – at sighiu a nai Nigola Fratoianni, s’abarrat chena fueddus de averas po comenti si strumentalitzat e finas po is chistionis umperadas, chi mi funt partas pagu cosa”
Coment’est possibili, insighit Fratoianni, ca “su ministru de sa guerra manna chena peruna duda a is ‘rave’, su ministru chi non s’arriolat de sa politzia chi scudit a corpus de manganellu is studentis e cussus chi difendint s’ambienti, su matessi ministru de is acordius illegalis cun is regimis de s’Africa de pissu e de sa guerra, finas custa chena duda peruna, contras is Ong e chi in totu is tribunalis de su Stadu nostu benit smentiu, non s’intendat arriolau po cussu chi est sussedendu in Italia?”
“Sa sola cosa chi bolit, forsis, acabbat de nai Fratoianni, est cussa de fairi arregalus a su guvernu e ddu agiudai in cust’ora de dificoltadi manna chi tenit”.
Màuru Mura
Mercuris, su tres de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://telenord.it/liguria-fratoianni-si-orlando-risorsa-importante-per-il-centro-sinistra-72837
