“E deu soi frimu cun is orrodas in terra, non stampadas, dona atentzioni, ma in pissu de s’asfaltu. E non si moveus po mori de custas comemoratzionis de custa minca”: aici at chistionau su boss Mateu Messina Denaro, su bintitres de maju passau, dì de s’arregodu de sa stragi mafiosa aunia fut mortu su giuigi Giuanni Falcone, sa pobidda e is ominis de sa scorta. Fueddus agataus in d’una chat chi Messina Denaro teniat cun calencuna de is patzientis connotas in su spidali. Cumpangias de viagiu chi faiant sa chemioterapia. Su boss fut inchietu poita fut frimu in su traficu e forsis non lompiat in tempus po sa cura. “Mundu porcu”, naraiat su mafiosu, e acabaiat: “innoi mi soi segau is callonis, ma meda”.

Messina Denaro, chi a is feminas de sa chat no at mai nau chini fut de averas, contaiat a issas de sa maladia e si cunfidaiat po agatai cunfortu: “Mi intendu postu a una parti. Comenti unu cani chi non tenit domu e tenit una camba segada e s’agatat in mesu de su caminu, in custa noti de Paschigedda. Totu custu po mei est de una tristura manna, ia bolli chi calencunu mi dongiat amori. Ma est giustu a pediri amori”, is fueddus chi su boss scriiat.

In d’unu de is messagius su boss, chi iat contau de fairi s’imprendidori e de essiri un’omini cun d’una coja andada mali a is palas, contat de unu disigliu de sa mama. “C’est Anna, iat essi sa picioca chi est paris a mama mia. Eriseru m’at cicau, at agatau unu paperi scritu de sa manu de mamai.Est po mei, cussu chi ddu est scritu e narat ca candu si morit, a s’interru, ma chini narat ca deu mi morgiu a innantis de issa, non ddu scit issa e non ddu sciu mancu deu, – sighit a scriri Messina Denaro – bolit sa musica chi depit sonai feti una cosa, sa marcia de su Kaiser, cussa chi sonant in Vienna po s’Annu nou. E duncas immoi bolit custa cosa, po mei si depit fairi poita sa volontadi de sa genti si depit portai a innantis”.

 

 

Màuru Mura

 

 

Lunis, su ses de friargiu de su 2023

 

 

Foto: https://www.ilsussidiario.net/news/matteo-messina-denaro-audio-choc-su-falcone-per-commemorazioni-di-sta-minhia/2484696/