“S’agatat una particolaridadi crara meda de su cumentzu de su caminu nostu, non s’est mai bidu partenduru de is primas seti giornadas de sa Serie A de ocannu chi benit, cun cuatru partidas in domu, cumpartzias de una foras de domu. Eus a biri comenti s’at a ponni sa cosa in campu. Est a nai finas ca non podeus donai perunu giuditziu poita, immoi, in su cumentzu de triulas ancora is scuadras funt de fraigai”, aici su diretori de su Casteddu Nereo Bonato dapoi airi ligiu is partidas de su Casteddu intru de su campionau benienti.
“At a tocai a si fairi agatai prontus inderetura – sighit Bonato – e lompiri a is urtimas partidas sempiri prontus: su caminu nostu, difatis, at a tenni una prima parti cun partidas medas cun scuadras, chi comenti de nosu, ant a gherrai po si sarvai, sonumancu in su paperi. Is matessis scuadras ddas eus torrai a atobiai in sa parti de dus in s’ora prus diliga de su campionau. In sa parti de mesania de su matessi campionau, invecias, eus a atobiai is scuadras prus fortis, sempiri po cussu chi narant is paperis. Cun custas depeus essiri bravus a nosi giogai is cartas nostas cheba timiri a nemus”.
Po cantu pertocat sa parti de dus su Casteddu at a tenni prus partidas foras de domu e Bonato narat: “Abbisongiat fairi dogna partida una po una, in domu comenti de a foras. In is urtimus dus annus seus stetius bravus meda a cambiai passu in sa segunda parti candu eus fatu is puntus chi nos abbisongiaiant po, a innantis, bessiri in serie A e, in seugs, po ddue abarrai”.
Sa prima partida de su Casteddu, in su fini de cida a pustis Mesaustu, at essi duncas cun sa Roma e sa de duas cun su Como. Sa prima partida foras de domu at essi in sa giornada de tres cun su Lecce.
Custas is atras partidas de sa giornada de unu: Genoa-Inter, Milan-Torinu, Juventus-Como, Bologna-Udinese, Empoli-Monza, Veron-Napoli, Latzio-Venetzia, Lecce-Atalanta, Parma-Fiorentina.
Màuru Mura
Cenarba, su cincu de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://sport.quotidiano.net/calcio/seriea/sorteggio-calendario-2024-2025-diretta-qfqzk1x0
