“Custa bia mi parit chi si siat esagerau”. Ddu at nau su ministru Antoni Tajani, po su contu de Ilaria Salis, sa professoressa de arreiginis sardas fata imbucai cun is cadenas in is burtzus de is peis in su tribunali de Budapest. “S’andat contras de is cumandus de s’Europa e finas contras sa civiltadi giuridica nosta”, at aciuntu fueddendu in “Radio Anch’io”.
Eris a merì su babbu de sa picioca, Orrobertu Salis, est intervenniu in sa trasmissioni “Quarta Repubblica”: “Figlia mia est stetia torturada po trintacincu dis, est stetia lassada cun is bestiris brutus e po otu dis est abarrada in presoni a sa sola chena nemancu su paperi po si puliri o saboni. A innantis chi s’ambasciada ce dd’at fata a ddi portai unu pacu, chi fut giai a disponimentu de paricias dis, Ilaria at depiu umperai is bestiris po si sciutai a pustis s’essiri samunada”.
Salis at bistu sa figlia po s’urtima bia, a innantis de eris, su 26 de Sant’Andria. “Apu scipiu de comenti fut posta poita eus erriciu una litara de Ilaria a is abogaus e chi fut stetia mandada a s’ambasciada. In custa litara ddue fut scritu totu cussu chi est sussediu de candu figlia mia est stetia impresonada. Est sonumancu de cuatru atobiu in tribunali chi Ilaria est aici. S’ambasciada ddu sciat, ma no at fatu nudda, po mimi no ant trabagliau beni”.
Martis, de sa cida passada, Orrobertu Salis at chistionau cun su ministru Nordio: “Eus fueddau po fairi calencuna cosa po cicai de portai Ilaria in Italia. Ci funt cosas chi non torrant, ma su caminu est cussu chi tocat a sighiri. S’importu mannu est cussu de non si passai sa bocia de una parti a s’atra, tocat a ndi pesai una truma de personis chi possant pigai decisionis. Immoi su tempus de is ciaciarradas depit acabbai e depeus passai a su tempus de fairi”, at aciuntu su babbu de Ilaria. Sa spera est manna.
Màuru Mura
Martis, su trinta de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/2024/01/30/llaria-salis-in-aula-con-le-catene.-tajani-non-in-linea-con-la-nostra_fa67b2ab-278a-43e2-8a89-5f3a0301f854.html
