Partida de importu mannu est cussa de su Casteddu, dominigu a mesudì e mesu in s’Unipol Arena, contras de su Lecce. S’acostiat sa partida e Ranieri sighit a cicai novas bonas po cantu pertocat is giogadoris foras. In s’allenamentu de eris, a pustis su pasu de duas dis dapoi de sa partida cun su Genoa, s’est torrau a amostai Oristanio, chi est cichendu de si ponni a postu, in segus de su corpu chi at pigau in sa matessi partida de lunis.
A una parti finas Viola, chi cicat de si ponni a is cumandus de Ranieri po sa partida cun su Milan. A una parti cun Viola si ddue funt agataus finas Mina, Dossena e Pavoletti. Sempiri in pasu Jankto. Non serbit a nai ca Ranieri iat a bolli, e sa spera est manna, de ddus podiri tenni dominigu. Eris s’est amostau Makoumbou puru, chi mancaiat sa dì a innnantis poita acaglienturau. Oi, a mengianu atru allenamentu e dapoi Ranieri at a chistionai cun is giornalistas.
Fustis nendu de s’importu de sa partida cun is pugliesus. Bincendu, is piciocus de Ranieri, iant a lompiri a trintacincu puntus e nd’iat a bastai feti unu o dus in is atras tres partidas contras de su Milan, su Sassuolo e sa Fiorentina. Ma forsis nemancu, ca castiendu is partida de is atras scuadras, chi funt gherrendu po non ci calai, non si podit creiri ca ant a fairi puntus meda. De segus est finas a nai ca, giai de dominigu cun Empoli-Frosinone, c’ant essi partidas intru de custas scuadras. Duncas chini perdit s’agatat in disacatu mannu. Sa Salernitana est giai spaciada, su Sassuolo est cun d’unu peis e mesu in Serie B e mancat su nomini de sa scuadra de tres chi ddas at acumpangiai. Nosu seus prontus a scumitiri ca nd’at a bessiri dominigu intru de chini perdit sa partida de Empoli. S’Udinese parit tropu forti comenti de ominis po ci calai.
Sa bocia est tunda, ma in cust’ocasioni nosi parit cuadrada!
Màuru Mura
Cenarba, su tres de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.dazn.com/it-IT/home/ajhc6iouly79r00o560j1rcpg
