A pustis chi Joe Biden at fatu unu passu agoa, po sa Domu Arva, funt medas is caminus chi s’oberint in pissu de sa torrada eletorali de su mesi de Sant’Andria in is STadus Unidus. Su presidenti, ancora in carriga, at scritu una litara a is americanus aunia spiegat is arregionis. Intur de atras cosas narat: “Creu chi sia in su interessu meglius de su partidu miu e de sa Natzioni de mi ponni a un’ala e pensai feti a cussu chi depu fairi, comenti de presidenti, po s’orrestu chi m’abarrat”.
Unu funtzionariu chi trebbagliat in sa Domu Arva at bofiu precisai ca in custa decisioni de Joe Biden non s’agatat peruna arregioni de saludi. Intru de is fueddus medas lompius a pustis chi Biden s’est postu a una parti agataus finas cussa de Robert F. Kennedy Jr: “Soi su solu candidau chi possat binciri contras de Donald Trump”.
Biden, in su gratempus, at giai nau ca po issu s’iat depiri candidai Kamala Harris, oberendu aici su caminu a su sceberu de unu nou numuru dus. Funt, a dogna manera, sonumancu ses is nominis chi si faint, intru de is democratigus, po ddus ponni contras de Trump, de sa governadora de su Michigan Gretchen a su segretariu a is Trasportus Pete Buttigieg.
Su de unu est Ray Cooper, guvernadori de sa North Carolina, chi est unu moderau chi si dda scit giogai in sa filera politiga de su Stadu. Cooper at bintu bortas meda trabbagliendu finas cun is republicanus, finas po ammanniai su Medicaid, chi est s’assistentzia sanitaria po is poburus.
Su de dus est Josh Shapiro, guvernadori de sa Pennsylvania de su 2022 e chi si pensat, de tempus, chi podit essiri su primu presidenti ebreu de is Stadus unidus. Est giovunu meda, ca tenit feti 51 annus.
Sa de tres est Gretchen Whitmer chi est guvernadora po sa borta de duas in su Mitchigan.
Su de cuatru est Mark Kelli, senadori de s’Arizona. E is atrus dus, su de cincu e su de ses funt Andy Beshear, guvernadori de su Kentucky e Pete Buttigieg, segretariu de is trasportus de s’amministratzioni Biden.
Màuru Mura
Lunis, su bintidus de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.open.online/2024/07/18/joe-biden-verso-ritiro-staff-sconfortato/
