Unu puntu chi scit de marigosu, cussu erribau eriseru po su Casteddu in sa partida contras de sa Fiorentina. Casteddu a innanti a su cumentzu de sa segunda parti cun su capitanu Joao Pedro a pustis chi in sa prima parti sa Fiorentina iat faddiu unu rigori cun Biraghi e is piciocus de Mazzarri iant boddiu dus palus, a innantis sempiri cun Joao Pedro e a pustis cun Marin. Su brasilianu de su Casteddu at faddiu unu rigori, candu su Casteddu s’agataiat galu po 1-0, chi podiat serrai sa partida finas poita sa Fiorentina fut in dexi ca s’arbitru ci iat bogau de su campu a Odriozola. No est serbiu a nudda a s’agatai cun s’omini in prus poita a unu cuartu de ora de s’acabu Sottil at segnau, arregalendu unu puntu a sa scuadra sua.

Mazzarri, s’allenadori de su Casteddu, at chistionau a pustis cun is giorronalistas: “Ci eus fuliau a s’aliga dus puntus chi furint meritaus e chi nosi serbiant meda. Sa partida fut binta, cun unu rigori de batiri e cun sa Fiorentina in dexi. Ma finas chi eus faddiu su rigori, cun s’omini in prus depiaus sighiri a giogai comenti fustis fendu”. Ma s’allenadori toscanu castiat finas cussu de bonu chi at nau sa partida: “Est diventendu su Casteddu de Mazzarri, sa scuadra est gioghendu beni cun giovunus medas chi s’incrarant po sa prima borta in sa Serie A. In medas ant giogau chena si podiri allenai in is dis passadas ca furint impestaus de su Covid. Chi fustis stetius prus capassus e barrosus in is fascias ddus podiaus ponni ancora de prus in dificultadi. Su gol chi eus pigau? Non ce dda facu a cumprendiri cussu chi eus fatu, non ddu possu nai a bosatrus chini at fatu unu sciolloriu, ma a su giogadori chi ddu at fatu si ddu nau de seguru in carigas. Nosu de candu eus possiu fairi cussu chi boliaus seus crescendu in dogna partida. Depeus sighiri aici poita ancora no eus fatu nudda, ma de seguru ce dda eus a fairi a bessiri a foras de is urtimas tres de sa classifica”.

 

 

24 de gennargiu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.youtube.com/watch?v=UxqIRCEq_4c