“Eris a mengianu nosi ndi seus scidaus totus arriolaus po is novas chi lompiant de sa Polonia, eus pregontau novas noas, nosi seus atobiaus e eus chistionau cun is alleaus. Sa pensada chi in Polonia siat orrutu unu missili de s’antiaerea ucraina non mudat sa sustantzia: sa responsabilidadi de cussu chi est sussediu, po cantu nosi pertocat, est totu de sa Russia”.
Ddu at nau Giorgia Meloni, su presidenti de su Guvernu italianu, in s’atobiu cun is giornalistas in Bali aunia is potentis de sa Terra si funt riunius po su G20.
G20 chi est stetiu “unu sucessu, finas chi ddue fut aria de fallimentu”, at sighiu a nai sa Meloni. Intru is sucessus ddue funt sa cundenna de totu po s’invasioni russa e s’acordiu po su cigirianu, at sighiu a nai su Presidenti de su Consigliu.
Galu po cantu pertocat s’Ucraina: “Totu nosi rendeus contu chi si debit trabbagliai po cicai una solutzioni de sa crisi, ma non si podit non biri de sa volontadi de sa natzioni invadia, sa spera est de agatai un’acordiu cun Zelensky po bessiri in su tempus prus curtzu possibili”.
Su ruolu de s’Italia: “Seus stetius protagonistas, nos ant castiau cun atentzioni manna e crosidadi, de seguru finas poita s’Italia est sa sola a teni unu Presidenti de su Guvernu femina. In pissu de sa paridadi s’Italia fut s’urtima, immoi, invecias, seus a s’avanguardia e custa est una cosa chi fait prageri”.
Is atobius a dus, in su mentris chi is trabbaglius andaiant a innantis in Bali, po sa Meloni funt stetius medas ma su prus de importu mannu est cussu cun su presidenti americanu Joe Biden: “Eus chistionau, cun gentilesa, po tempus meda, e nosi seus impromintus de nosi torrai a biri coitendu. Eus chistionau de energia, is Stadus Unidus nosi garantit sa disponibilidadi po aumentai is forniduras de su gas. Abarrat oberta sa chistioni de is pretzius, ma eus agatau un’aministratzioni chi tenit gana de arregionai cun s’Unioni Europea po agatai un’acordiu po fairi calai is pretzius, pensendu perou ca meda fornidoris funt siendas privadas”.
Màuru Mura
Giobia, su 17 de Sant’Andria de su 2022
Foto: https://www.repubblica.it/politica/2022/11/15/news/meloni_g20_bilaterale_biden_xi_jinping_posta_in_gioco-374582282/
