Castiendu sa classifica, cun sa Torres in sa zona arta e s’Olbia in cussa de basciu, forsis non ddue at essi partida. Ma unu derby est sempiri unu derby e non iat a spantai chi is galluresus bincant sa partida. Su problema de s’Olbia est su gol, pagu de fairi. Difatis est de seti partidas de sighiu chi is terranoesus non ddi faint unu chi siat unu. Po cust’arregioni sa spera de is tifosus de is arbus est chi s’urtima compora, s’atacanti Andria Bianchimano, possat agiudai s’orrestu de sa scuadra a ddu agatai. Ma no at essi facili ca sa Torres at amostau, po s’ora, una fortza de spantu de averas. Non po nudda indenanti de sa classifica tenit feti su Cesena.
“Facu su tifu po s’Olbia e sa spera est chi dominigu binciat. Mancari, torrendu gratzias a is comporas noas una vitoria in Tatari si podit finas agatai”, narat Giusepu Saraò, portieri de s’Olbia in su tempus chi andat de su 2013 a su 2015 candu is gadduresus funt in sa Serie D. “Bianchimano in sa Reggina at fatu beni de averas, est un’atacanti balenti, e Tanieli Ragatzu at sempiri fatu gol: s’urtima bia in campionau in Tatari su matessi Ragatzu at fatu su gol, a s’acabbu de sa partida, de su paregiu po 1-1. Fut stetia una partida cumbatia meda”.
In Olbia funt in medas cussus chi tenint fidi in Ragatzu, chi ocannu passau at fatu dixianoi gol e est stetiu cussu chi nd’iat fatu de prus de totus in su Gironi B de sa Serie C. Ocannu est partiu prus a bellu, chena farta, fendu feti cuatru gol in dixiaseti partidas giogadas, ma tenit totu su tempus a dispositzioni po fairi meglius. S’orrestu de sa scuadra, a dogna manera, ddu depit agiudai poita non depit intendiri sa curpa de is gol chi s’Olbia non ce dda fait a fairi. “Bianchimano iat podit essiri su cumpangiu de atacu chi serbit finas a Ragatzu. Paris podint fiari beni meda”, sighit a nai Seraò.
Màuru Mura
Cenarba, su dixiannoi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.milannews.it/news/l-ex-milan-andrea-bianchimano-riparte-dal-renate-502247
