Prus de duxentucincuanta navis funt prontas a lompiri in Sardigna in su 2024 cun in pissu “sonumancu 650 mila personis”.
Funt is previsionis po is mesis benientis po cantu pertocat is crocieras in s’Isula, is calis calendarius funt stetius publicaus in su giassu de s’AdSP e chi amostant ca andat sempiri meglius.
Ocannu passau, chi est acabbau de binti dis, si funt amostaus, prus o mancu, 438 mila turistas de crociera (344 mila in su portu de Casteddu, prus o mancu 80 mila in cussu de Terranoa, 2.400 in Figari 1.500 in Porthudòrra, 150 in Arbatassa e prus o mancu 7.400 in Aristanis) chi funt cuasi duas bortas in prus cunfroma a su 2022.
Cussu apena cumentzau, chi est giai prenu de scalus de s’ierru de MSC in sa capitali sarda – amostat invecias, 177 lompimentus in Casteddu (chi funt 75 in prus de ocannu passau) 75 in Terranoa (29 in prus), cincu in Figari, tres in Porthudòrra e dus in Aristanis (chi funt su matessi de ocannu passau).
Is numurus donaus funt feti in parti e s’ant aciungiri in is cidas benidoras atras prenotatzionis in Arbatassa e altras dis de lompimentu.
Intru de is novas agataus sa torrada de MSC in Casteddu, cun erribus, po totu s’annu, de is nais Orchestra, Musica, Lirica et Explora. Torrant a lompiri finas is nais de sa truma Carnival chi torrada in dogna cida cun sa Costa Smeralda de Costa Crociere, s’Aida e sa Seabourn. Presentis finas sa Norwegian Cruise Line, Marella, Tui Cruises e totu is atras trumas prus famadas de nai. Totu custu po cantu pertocat Casteddu.
In Terranoa, invecias, s’erricant cun su lompimentu de Costa Crociere chi cun sa nai Pacifica s’aciungit a sa nai Orchestra e de sa Marella Explorer e de is atras nai, erricas medas, comenti Regent, Azamara e Silver Sea.
“Finas chi est feti una parti de su programa de is crocieras, podeus giai nai ca is numurus ant essi de spantu, comenti mai sussediu a innantis”, narat Massimu Deiana, presidenti Adsp de su Mari de Sardigna.
Màuru Mura
Sabudu, su binti de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://siviaggia.it/notizie/costa-venezia-nave-crociera/205882/
